Assi: Peter Barfoed

Illersornissamut Qullersaqarfik: Kina nakkutigaarput

Kina Issittumi pissaanilissuartut inissinniarsarileruttorpoq. Illersornissamut Qullersaqarfiup paasiniaasartuisa tamanna alaatsinaaffigaat.

Kinap naalagaaffittut Kinamilu suliffeqarfiit Kalaallit Nunaanni Issittumilu iliuuserisaat, Illersornissamut Qullersaqarfiup malinnaaffigai. Qullersaqarfiup 2015/2016-imut nalunaarusiaani, saqqummiunneqaqqammersumi, tamanna atuarneqarsinnaavoq.

- Kinap nunarsuup immikkoortuani matumani pingaarnertut soqutigisai tassaanerupput aningaasarsiorsinnaanermut tunngasut, immakkullu angallannermi angalaffissat isorartuallaarunnaarnissaannut pisuussutinullu tunngasut. Taama ineriartortoqarnera Illersornissamut Qullersaqarfiup paasiniasartuinit qanittumik malinnaavigineqarpoq. Kinap Issittumi pingaarutilittut inissikkiartorniarsarinera pingaarnertut malinnaavigineqarpoq, Illersornissaqarfiup nalunaarusiaani tamanna ilaatigut atuarneqarsinnaavoq.

Suliffeqarfiillumi Kinameersut arlalippassuartigut saqquminerulaalersimapput, tamaani aningaasaliinikkut suliffeqarfinnilluunniit pisiortorniarsarinikkut saqquminerulaalersimallutik.

Illersornissamut Ministereqarfik Kangilinnguani Sakkutooqarfiup Kinamiut suliffeqarfiannit General Nice Groupimit pisiariniarneqaraluarneranut akuliussimasoq, nittartakkap Defencewatchip siorna decembarimi allaaseraa.

USA-lli Kinallu Nunatsinni sunniuteqarpallaalernissaat matumani pinngitsoortinniarneqartoq, tuluit nutaarsiassaqartitsiviata Reutersip kinguninngua aamma allaaseraa.

Kangilinnguani Sakkutooqarfiup Illersornissamut Qullersaqarfimmit pigiinnarneqarnissaa Danmarkimi naalakkersuisut kissaatigimmassuk, Kinamiut Kangilinnguanik soqutiginninnerannut itigartitsisut, Danmarkimi naalakkersuisut oqaatigaat.

GME-mi piginneqataasutit 12,5 procentiinik Kinamiut piginneqatigiiffiannit pisiariniarneqarnerat oqallitsitseqaaq, pisinissamut tunngasumik Kinamiut tusagassiutinut allagaat pissutigalugu.

Taassuminga Politikenip nutserisitsinera najoqqutaralugu allassimasoqarpoq, pisinissamut piumasaqaataasoq, GME piiaanisssamut akuersissummik tunineqarpat, tassannga piginneqatigiissutit 60 procentiinik Kinamut piginneqatigiiffiat pisinissamut periarfissaqartitaassasoq. Tamannali GME-mit arlaleriarluni itigartitsissutigineqarpoq.

Kinamiut taama aningaasalersuisarnerat naalagaaffitsigoortuugunanngitsut, Illersornissamut Qullersaqarfiup paasiniaasartut nalunaarusiaani ilaatigut allassimavoq. Pissutsilli taamaattoq malinnaavigineqarput:

- Kinamiut suliffeqarfiisa Kinamilu oqartussat akornanni atassuteqartoqarsinnaanera eqqarsaatigalugu Kinamiut assersuutigalugu Kalaallit Nunaanni aningaasalersuiniarnerat aarlerinartortaqarsinnaavoq, Illersornissamut Qullersaqarfiup paasiniaasartui ilaatigut allapput, aarlerinaateqarsinnaasut suuneri annerusumik iserfiginagit.

KNR-ip Illersornissamut Qullersaqarfiup paasiniaasartui attaveqarfigisimagaluarpai, aarlerinaateqarsinnasut suuneri paasiniarlugu. Maannamulli tamanna iluatsissinnaasimanngilarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat