Politikki

Tusagassiuut: Kangilinnguit kinamiut pisiaringajakkaat

Illersornissamut qullersaqarfiup Kangilinnguanik ammaaqqittussanngornera Illersornissamut qullersaqarfiup pisariaqartitsineranik tunngaveqanngilaq, sakkutooqarfiusimasulli kinamiunit aningaasalersuisartunit pisiarineqarnissaa pinngitsoortinniarlugu iliuuseqarnerulluni.

Allattoq Helle Nørrelund Sørensen

decembarip 15-at 2016 05:24

Nutserisoq Simon Uldum -

Nittartagaq Defencewatch taama allaaserisaqarpoq.

Tusarfiit danskit naalakkersuisunut qanittumik inissisimasut naapertorlugit, ministeriunerup Lars Løkke Rasmussenip partiit Danmarkimi illersornissaq pillugu isumaqatigiissuteqartut aasaanerani sulinngiffeqarnissaq sioqqullugu peqquai Kangilinnguit Illersornissamut qullersaqarfimmit pigiinnarneqarnissaa qulakkeeqqullugu, Defencewatch taama allappoq.

Sakkutooqarfiusimasup pisiarinissaanut soqutiginnittoqarpiarsimanngilaq, soqutiginnittulli ikittuaqqat ilagaat kinamiut suliffeqarfiat, ministeriunerullu partiillu Kangilinnguit suliffeqarfimmit tassannga pisiarineqarnissaa kissaatigisimanngilaat.

Aamma atuaruk Kangilinnguani sakkutooqarfik ammaqqittussanngoraat

Illersornissamut ministereqarfiup maannamut ilisimatitsissutigaa Issittup illersorneqarneranut atatillugu Kangilinnguit pilersaarusiornermut pilersuinermullu atorneqassasoq. Tusarfilli danskit naalakkersuisuisa pilersaarutaannik ilisimasaqartoq naapertorlugu, Namminersorlutik Oqartussat Kinamilu naalakkersuisut aporaaffiginnginnissaat pissutaarpiarpoq, Defencewatch taama allaaserisaqarpoq.

Nunani tamalaani aningaasalersuisartut Nunatsinni aningaasalersuinissaat Nunatta maannakkorpiaq sulissutigaa.

Nutarterneqarpoq nal. 8.10: KNR-ip Danmarkimi Illersornissamut ministereqarfik attaveqarfigaa. Suliamut tunngatillugu oqaaseqarusunnatik ministereqarfimmeersut oqaatigaat.