Politikki

Kangilinnguani sakkutooqarfik ammaqqittussanngoraat

Nunatsinni kajumissutsiminnik upalungaarsimasussat pilersinneqassapput, Issittumi Sakkutooqarfik nukittorsarneqassaaq Illersornissamullu qullersaqarfiup sakkutooqarfiusimasoq Kangilinnguit ammaaqqissavaa.

Allattoq Helle Nørrelund Sørensen

decembarip 09-at 2016 06:22

Nutserisoq Simon Uldum -

Danskit naalakkersuisuisa Illersornissamut ministereqarfiup Issittumi siunissami suliassai pillugit Radikale Venstre Socialdemokraatillu peqatigalugit isumaqatigiissutigisaat ilaatigut taama imaqarpoq.

Isumaqatigiissutaasoq Illersornissamut ministereqarfiup misissueqqissaarinerata ukiunik arlalinnik kinguaattoorutigalugu aasaq saqqummiussaata annerpaartaatigut assigaa.

Isumaqatigiissuteqarnikkut kunngeqarfiup issittumi pigisaata illersornissaanut Illersornissamut qullersaqarfik siunissami ukiumut 120 millionit koruunit atortassavai. Tamanna ilaatigut qaammataasat timmisartuaqqallu inuttaqanngitsut atorlugit, kajumissutsiminnik upalungaarsimasussanik pilersitsinikkut Issittumilu Sakkutooqarfimmi Nuummiittumi sulisut amerlinerisigut pissaaq.

Aamma atuaruk Kangilinnguit ammaqqinnissaa illersornissaqarfiup isumaliutigigaa

Nutaatullu, sakkutooqarfiusimasup Kangilinnguit 2012-imi matuneqartup Illersornissamut qullersaqarfimmit ammaqqinneqarnissaa isumaqatigiissuteqarnermi aamma aalajangiunneqarpoq.

Sakkutooqarfik orsussanik imaanilu avatangiisinik mingutsitsinermut akiuiniarnermut atortussanik inissiisarfittut atorneqassasoq isumaqatigiissummi atuarneqarsinnaavoq.

Illersornissamut ministereqarfiup Issittumi siunissami suliassai pillugit isumaqatigiissut uani atuarneqarsinnaavoq. (danskisuinnaq allaqqavoq)

Nutaarsiassami kukkunermik nassaarsimaguit uunga allaffigineqarsinnaavugut.