Kangilinnguit ammaqqinnissaa illersornissaqarfiup isumaliutigigaa

Kangilinnguit uumassuseqaleqqissinnaapput.

Illersornissaqarfik naapertorlugu maanna oqaloqatigiittoqarpoq Kangilinnguit Issittumi sakkutooqarfimmut tapertatut atorneqarsinnaanersoq.

Soorlu toqqorsivittut ingerlatsinermiluunniit suliassanut annikinnerusunut.

Kommandørkaptajniusimasorli Issittumilu sakkutooqarfimmi pisortaasimasoq soraarneq Per Starklint naapertorlugu Illersornissaqarfiup Kangilinnguit ammaqqinneqarnissaat pisariaqartinngilaa.

- Nassuerutigissavara takusinnaarpiannginnakku tapertamik pisariaqartitsinerat. 

Taanna Kangilinnguani sakkutooqarfiup Nuummut nuunneqarnissaanut maanna Issittumi sakkutooqarfimmik taagorneqartumut suleqataasimavoq.
Taanna aamma isumaqarpoq Kangilinnguit ammaqqinneqarnissaannik isummerneq peqquteqartoq Namminersorlutik Oqartussallu qanoq saliinissamik isumaqatigiissinnannginneq pissutigalugu.

- Eqqoriarneqarsinnaavoq Kangilinnguani saliinissaq akisuallaassangatinneqartoq. Avatangiisit pissusitoqaannut utertinnissaannut. Millionerpassuillu saliinissamut atorneqartussat eqqaaginnarlugit Kangilinnguit pillugit nutaaliorniartoqalersoq.

Illersornissaqarfiup illuutinik nakkutilliivia KNR-imut allappoq Kangilinnguani suli avatangiisinik saliisoqarusuttoq, taamaaliortariaqarlunilu naak ammaqqinneqarnavianngitsut, Per Starklint taama allappoq.

Taassuma isumaa naapertorlugu Illersornissaqarfiup Kangilinnguit pisariaqartinngikkaluaraa ammaqqinnissaa ataatsimik peqquteqarsinnaavoq.

Umiarsualivia Illersornissaqarfimmut ammarteqqillugu arlalinnik sulisulerlugu pisariaqartitsisunut tamanut ammaanneqarsinnaavoq. Soorlu Mestervigimi mittarfik inunnit marlunnit ammatinneqartoq. Takornariartitsinerup nalaani Kangilinnguit umiarsualiviat ammatinneqarsinnaavoq umiarsuarnullu takornariartaatinut allanullu tulassinnaaneq ammaallugu, Per Starklint taama isumaqarpoq.