GME: Shenghemik isumaqatigiissusiaq akuersissutigineqarpoq
Pisineq allanngortitassaanngitsumik akuerineqartoq GME-p pisortaanerata maanna oqaatigaa.
Shenghep, australiamiut ingerlatseqatigiiffiata GME-p arfineq pingajorarterutaa pigilerpaa.
Pisinerlu, Australiami pappialanik nalilinnik niuerfimmi, piginneqataasunit australiamilu oqartussanit allanngortitassaanngitsumik akuerineqartoq GME-p pisortaanera KNR-imut allappoq.
GME-mi piginneqataasutit 12,5 procentiinik Kinamiut piginneqatigiiffiannit pisiariniarneqarnerat oqallitsitseqaaq, pisinissamut tunngasumik Kinamiut tusagassiutinut allagaat pissutigalugu.
Taassuminga Politikenip nutserisitsinera najoqqutaralugu allassimasoqarpoq, pisinissamut piumasaqaataasoq, GME piiaanisssamut akuersissummik tunineqarpat, tassannga piginneqatigiissutit 60 procentiinik Kinamut piginneqatigiiffiat pisinissamut periarfissaqartitaassasoq.
AAMMA ATUARUK Kuannersuarni suliniutissaq naalakkersuisooqatigiit misilittarneqaatigissagaat
Tassalu Kinamiut piginneqatigiiffiat taamaalilluni Kuannersuarni piiavissaq iluatseriarpat Australiamiut piginneqatigiiffianni pissaanermik tigumminnittuulissaaq.
Kisianni John Mair naapertorlugu taamaalinavianngilaq.
- Oqareernitsitut, Shenghe piginneqataassutinik pisisinnaanissamut immikkut periarfissaqassanngilaq, Pilersaarummiuna siunissami ungasinnerusumi akuunerunissamut soqutiginninnertik ersersiinnaraat, John Mair allappoq.
Taanna nangilluni nassuiaavoq, Shenghe piginneqatigiiffimmi oqartusaanerpaalernini piginneqataalernissamik pisisinnalersinneqassagaluarpat, Australiami piginneqataassutinik niuerfik, Australian Securities Exchange(ASX) pisinermi paasissutissanik tamanik piumasaqarsimassagaluartoq, kisianni:
- ASX-ip suliaq nalilersoreerpaa tamanillu naammagisimaarinnilluni, John Mair allappoq.
AAMMA ATUARUK Naalakkersuisoqatigiit allanngornerisa kingorna GME-p aktiaatai nalikilleriapiloortut
Tamakkiisumilli oqartussaasinnaanngorluni pisisinnaanisssamik periarfissiisoqarsimasinnaanersoq Namminersorlutik Oqartussat misissoqaarusuppaat. Aatsitassanut ikummatissanullu Naalakkersuisoqarfimmi pisortaq, Jørgen Hammeken-Holm, naapertorlugu, isumaqatigiissut oqartussat namminneq misissorpassuk pissusissamisoortuusoq.
- GME Kinamiut piginneqatigiiffiannut Shenghe Resourcesimut toqqaannanngitsumik tunineqalernersoq, inatsisilerisutta Namminersorlutik Oqartussat avataaniittup misissorpaa. Misissuineq naammassitinnagu pisinermut qanoq isummerumaarnerluta suli oqarsinnaanngilagut, Jørgen Hammeken-Holm oqarpoq.
Kuannersuarni aatsitassarsiortoqassagaluaerpat GME-p avatangiisinut sunniutaasinnaasunik naliliinini maanna inaarsarpaa.
Inaarsaaneq Namminersorlutik Oqartussanik oqaloqateqarluni pivoq, naammasseriarpallu tamanut tusarniaassutigineqassaaq:
- Tamanut tusarniaaneq aallartitsinnagu suut naammasineqariissasut naalakkersuisullu ukiumi nutaami isumaqatigiissutigissagivut neriuppugut, John Mair allappoq.
