Qulaarpaa Kuannersuarni suliniutissaq naalakkersuisooqatigiit misilittarneqaatigissagaat

Kuannersuarni piiaaviliornissaq naalakkersuisunit isummerfigineqartussanngorpat naalakkersuisooqatigiinni partiit urani pillugu qanoq isumaqatigiinnginnerat erseratarsinnaavoq. Inatsisilerinermi professori naapertorlugu naalakkersuisut suliniutinut nutaanut akuersinissaminnut itigartitsinissaminnulluunniit aatsitassat pillugit inatsimmi periarfissaqarluarput. Kuannersuarni suliniut akuerineqassanersoq taamaalilluni nalorninartoqarsinnaavoq.
novembarip 08-at 2016 12:56
Nutserisoq Simon Uldum -

Greenland Minerals and Energyp VVM-imik VSB-millu nalunaarusianik taaneqartut tamanut tusarniaassutigineqarnissaannut inaarsarlugit maanna suliarileruttorpai.

Kuannersuarni suliniutip inuiaqatigiinnut avatangiisinullu tunngatillugu sunniutissai nalunaarusiani taakkunani nassuiarneqassapput, nalunaarusiallu naammassinerisigut Kuannersuarni piiaavissap - GME-p 400 millionit koruunit atorlugit piareersaateqarfigeriigaata  -piviusunngortinnissaanut ingerlatseqatigiiffik pingaarutilimmik alloriassaaq.

Paasissutissat

Siumup, IA-p Partii Naleqqallu naalakkersuisooqatigiinnissamik isumaqatigiissutaanni immikkoortoq ataaseq aatsitassanut tunngasoq allamik taarserneqarsimavoq.

  • Makku peerneqarput:
  • "Naalakkersuisooqatigiilersut erseqqissaatigissavaat Kuannersuarni aatsitassanik qaqutigoortunik piiasoqalersinnaanera aatsaat akuersissutigineqarsinnaasoq aatsitassarsiornermut inatsimmi piumasaqaatit tamakkiisut naammassineqarsimappata, paasissutissallu sukumiisut qinnuteqarsinnaanermullu tamakkiisutut isigineqarsinnaasut pigineqalerpata. IAEA-p isumannaallisaanermut najoqqutassiai aamma Euroatomimik suleqatigiinnissamik isumaqatigiissummi piumasaqaataasut naammassineqarnissaat matumani eqqaaneqassapput."
  • Taarsiutigalugu una ilanngunneqarpoq:
  • "Inuit Ataqatigiinnut aammalu Partii Naleqqamut qitiusutut isigineqarmat inuussutissarsiutit pioreersut innarlerneqannginnissaat aammaalu uraminik attueqqusinngilluinnarnermiuk politikkiminnik aalajangiussisimammata, aammalu Siumumut illuatungaani uranimik akulinnik piiaanissamut periarfissamik ammatitsimmat, kiisalu tamanna inuit peqqissusaannut avatangiisinullu navianartorsiortitsinermik kinguneqassanngitsoq, taava Naalakkersuisooqatigiit isumaqatigiissutigaat apeqqut qaqinneqassasoq, tamanna siumut isigaluni ilaatigut uranimik akulinnik aammalu saffiugassanik qinngornilinnik piiaasoqarnissaa siunertaralugu qinnuteqaatit nutaat pisiartilertippassuk. Naalakkersuisooqatigit taamatut isumaqatigiissuteqarput, Kalaallit Nunaanni pissutsit amerlasoorpassuit peqatigiilluni aammalu suleqatigiilluni aatsaat qaangerneqarsinnaammata, aammalu illuatungeriit kissaatiginngimmassuk apeqqutit ataasiakkaat suleqatigiinnissamut aporfiunissaat."

Najoqqutarisat: Naalakkersuisooqatigiinnissamik isumaqatigiissut 2014-2018 aamma Naalakkersuisooqatigiinnissamik isumaqatigiissut 2016-2018.

Aamma atuaruk Sulisitsisut: Aatsitassarsiorusussinnaasunut politikkikkut kalerrisaarineq pitsaanngilaq

Nalunaarusiat tamanut tusarniaassutigineqareerpata Naalakkersuisunit akuerineqassapput, taamaaliortoqareerpallu ingerlatseqatigiiffik piianissamut akuerineqarnissamik qinnuteqaateqarsinnaalissaaq - qinnuteqaallu taanna Naalakkersuisunit aamma nalilersuiffigineqarlunilu akuerineqartussaassaaq.

Aamma atuaruk Naalakkersuisoqatigiilersut Qulaarpaami sammineqassapput

Aatsitassanut naalakkersuisunngortoq Inuit Ataqatigiinneersoq Múte Bourup Egede KNR-imut e-mailikkut ima allappoq:

- Qinnuteqaat naalakkersuisunit naggataatigut isummerfigineqartussaassaaq, pissutsillu attuumassutillit tamaasa nalilersuinermi ilanngunneqarumaarput, Múte Bourup Egede taama allappoq.

Københavnip Universitetiani inatsisilerinermi professori, Peter Pagh, naapertorlugu piiaanissamut akuerineqarnissamik qinnuteqaatip qaqugukkut akuerineqarnissaa aatsitassat pillugit inatsimmi erseqqissumik allassimanngilaq, naalakkersuisut taamaalillutik suliniutinik itigartitsinissaminnut periarfissagissaarput:

- Inatsit suliutaasup piianissamut akuersissummik tunineqassanissaanut itigartinneqarnissaanulluunniit tunngatillugu siammasingaatsiartumik nalilersuinissamut inissaqartitsivoq, Peter Pagh taama oqarpoq.

Aamma atuaruk URANI Isummat allanngorpata Namminersorlutik Oqartussat taarsiisariaqalersinnaapput

Taamaalillunilu naalakkersuisut akunnerminni assortuunnissaat ilimanaateqarpoq, illuatungaani Siumut uranimik piiaanngilluinnarnissamik atorunnaarsitsisoq, illuatungaanilu Inuit Ataqatigiit, uranimik piiaanissamut akuerliulluinnartut.

Naalakkersuisooqatigiilersuni uranimut akerliusut GME-p piiaaviliornissamik suliniutaata siunissaa pillugu qanoq isumaqarnersut KNR-ip oqalliffimmi Qulaarpaami sisamanngorpat akissutissarsiniarsarissavaa. Nalunaaqutaq 20.00 aallakaatinneqassaaq aallakaatitsinerlu KNR2-kkut toqqaannartumik danskisuunngortinneqassaaq.