Sulisitsisut: Aatsitassarsiorusussinnaasunut politikkikkut kalerrisaarineq pitsaanngilaq

Pinngortitamik illersuiniaqatigiit Avataq aamma Uraani Naamik nuannaarutigaat uranimut akerliusumik aatsitassarsiornermut naalakkersuisoqarfimmiittoqalermat. Tamannali Sulisitsisunit isumaqatigineqanngilluinnarpoq.

Taakku isumaqarput naalakkersuisut nutaat siunissami Kalaallit Nunaanni aningaasaliisussanut ajoqusiisut, urani pillugu politikkimut nalornisitsigamik.

Piffissaq taama tusarliiffiusoq ajornerpaavoq isumaqatigiittoqarmat taanna pillugu isumaqatigiinniarani, Sulisitsisut siulittaasuat Brian Buus Pedersen taama oqarpoq.

Taanna isumaqarpoq Kalaallit Nunaanni aningaasaleerusussinnaasut tatiginninnerannut tamanna ajortisaasoq. Naalakkersuisoqatigiilersullu nutaat Kuannersuarni assortuussutaasuni uranisiornissaq pillugu isumaqatigiissuteqarsimanngillat.

Isumaqatigiissutaanni allassimavoq, "naalakkersuisoqatigiilersut isumaqatigiissutigisimagaat uranisiornissamut allanillu piiaanissamut qinnuteqaatinik takkuttoqaraangat oqallisigisarniarlugit."

Taamaalillutik partiit isummerfigisimanngilaat GME'p nammineq nalunaarneratuut ukioq manna kingusinnerusukkut Kuannersuarni piiaaffiliornissamut qinnuteqaammik tunniussinissaanut, soorlu aatsitassarsiornermut naalakkersuisunngortup nutaap Qanoruumi apersorneqartilluni tamanna ima uppernarsaraa:

- Suliassat apeqqutillu takkukkaangata oqallisigisassavagut, Múte Bourup Egede oqarpoq.

Brian Buus Pedersen oqarpoq ersernerluttumik oqaaseqarnerup GME'p pilersaarummi piviusunngortinneqarnissaanut aningaasassarsiornissamut periarfissai ajoqusissagai, aningaasaleerusuttullu allat aamma sunnerlugit.

- Kuannersuit kisiisa eqqarsaatiginagit, aammali aatsitassarsiorusussinnaasunut allanut politikkikkut kalerrisaarinerusoq pitsaanngitsoq, Buus Pedersen taama isumaqarpoq.

Pisortaq naapertorlugu Kalaallit Nunaat aatsitassarsiornissamut mittarfiliornissanullu annertuumik aningaasaliisussanik pisariaqartitsivoq, aningaasaliisussallu asuli aningaasaliissanngikkunik politikkikkut ingerlariaatsimut tatiginnittariaqartut.

- Tatiginninneq taama ittoq pilersinneqanngippat, aningaasaliisussallu aningaasat asuli atornissaannut politikkikkullu aarlerinatik aningaasaliisinnaanngippata, taava annilaangatigaara Kalaallit Nunaat privatimik ingerlatsinerup tungaatigut annertusaanavianngitsoq, Buus Pedersen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat