Kielsen: Mittarfiliortiternissami suleqatissagut nammineq suli aalajangersinnaavagut
Apeqqummut ’Nunarput mittarfinnut pilersaarutinut atatillugu aningaasaliisussanik avataaneersunillu suleqatigisassanik nammiivilluni toqqaassanersoq’ Naalakkersuisut siulittaasuiat KNR-imut malikkut ima akivoq:
- Aap. Tamatumali oqaloqatigiinnissamut aallarteriikatsinnut, isummanut tusarnaarnissatsinnut, tunngavilersuutinut siunnersuutinullu, soqutigisatsinnut aalajangiinitsinnilu siunnerfisinnut iluaqutaasussanut, killilissanngilaatigut.
Danskit naalakkersuisui ernumasut
Kielsenip akissuteqarnera statsministereqarfiup Naalakkersuisullu naalaaffeqatigiinneq pillugu sapaatip akunnerata siuliani ataatsimeereerneranni tusagassiuutinut nalunaarutaannut akerliuvoq.
Tassani allassimavoq, kikkut mittarfinnik sanaartornissamut nunatsinnut aningaasanik atortitsisssanersut suliffeqarfillu sorleq sanaartortuussanersoq apeqqutaalluni, suliaq nunanut allanut sillimaniarnermullu politikikkut attuumassuteqarsinnaasutut danskit naalakkersuisuisa nalileraat.
AAMMA ATUARUK Danskit mittarfinnut aningaasaliinissaanut periarfissat Kielsenip Løkkellu misissorniarpaat
Taakkulu danskit akisussaaffigaat.
Taamaalillunilu nunarput mittarfiliortiternissami tamakkiisumik nammineertussaanngilaq. Ilisimatusarfimmi kulturimik, oqaatsinik oqaluttuarisaanermillu immikkoortortaqarfimmi adjunktiusimasoq, oqaluttuarisaanermillu ilisimatooq, Jens Wendel-Hansen taama naliliivoq.
Danmarkip nunanut allanut sillimaniarnermullu politikkikkut oqartussaanerata nunatta oqartussaffii qulangeqavai, aamma attaveqaqatigiinnermut tunngasut.
AAMMA ATUARUK Kinamiut sanaartugassinneqarnissaat Løkkep ernummatigigai
Taamaalilluni assersuutigalugu nunanit allanit aningaasaliinerit Danmarkip nunanut allanut soqutigisaanut akerliuppata statsministeri kingullertut oqaaseqartussaavoq.
- Lars Løkke Rasmussen itigartitsisinnaatitaasoq aamma oqaatigineqarsinnaavoq, Jens Wendel-Hansen oqarpoq nangillunilu:
- Danskit akerliuniaannassagaluarpata, tamanna danskit kalaallillu akornanni pissutsinut iluaqutaanavianngilaq. Kisianni aamma illuatungaani sunniuteqasupput.
Statsministerip nunatsinni mittarfinnik sanaartornissamut atatillugu Naalakkersuisut Inatsisartullu periarfissaannik danskit naalakkersuisui killiliiniannginnerarpai.
- Suliami uani aalajangeeriinngilanga. Aamma taama iliorniarsarinngilanga. Isumaliutiginninnissarli silatusaarnerussaneraannarpara, Lars Løkke Rasmussen oqarpoq.
