Kalaallit Airports 1 milliard koruuninik sipaaruteqarsinnaasoq
- Kalaallit Nunaannut neqeroorutigineqartoq danskit ministeriunerata Nuummi ataasinngornermi atsiugaa ajunngilluinnarpoq, Kalaallit Airportsimi aningaasaqarnermut pisortaq, Peter A. Wistofft taama oqarpoq.
- Ataatsimut katikkaanni aningaasalissutit taarsersorneranni 1 milliard koruuninik sipaarutaassaaq, taanna oqarpoq.
Taarsersuineq ukiunik 25-inik sivisussuseqassaaq.
AAMMA ATUARUK Danmarkip aningaasaliissuteqarneranut piumasaqaatit isumaqatigiinniutigileraat
Sipaaruteqarnissamut pissutaavoq, taarsigassarsiassat ikinneerarsuussammata taarsigassarsiarineqartullu erniakinnerujussuussamata, tamaalillunilu Kalaallit Airports aningaasarpassuarnik sipaaruteqassaaq.
Isumaqatigiissuteqarnikkut billitsit akikinnerulissasut
- Aningaasat 700 milliuunit koruunit nammineq pigisassatut pissavagut, taakkualu erniaqartussaanngillat, sinnerilu 450 milliuunit koruunit marloriaataasa eriniaat nalinginnaasumik taarsigassarsitsisarfiit erniaritittagaannit appasinnerussapput, tassa naatsorsuutigisatsinnit affaanit ikinnerussapput, Peter Wistoft oqarpoq.
AAMMA ATUARUK Løkke Nuummi Ilulissanilu mittarfinnik piginneqataarusuttoq
Tamannalu inuiaqatigiinnut atuisunullu pingaaruteqartorujussuussaaq.
- Tamatuma kingunerisussanngorpaa, ingerlatseqatigiiffimmut isertitassatut piumasarineqartut ikinnerulernissaat, ilaasunullu akitsuutit appartinneqarsinnaalissapput, tamannalu angalasut akikinnerusumik billetsisisinnaalernerannik kinguneqassaaq, tamakkiisumillu inuiaqatigiinnut sipaarutaassalluni, Peter A. Wistoft oqarpoq.
