Danmarkip aningaasaliissuteqarneranut piumasaqaatit isumaqatigiinniutigileraat
Naalagaaffiup Nuummi Ilulissanilu mittarfinnut 1,6 milliardit koruuninik aningaasaliissutiginiagai nunatsinnit iluaqutigineqassappata, Naalakkersuisut danskillu aningaasaqarnermut ministeriata akornanni isumaqatigiinniarnerit arlallit ingerlanneqaqqaassapput.
Danmarkip mittarfiliortiternermut aningaasatigut akuuneranut Kalaallit Airports A/S-imillu piginneqataaneranut sinaakkusiisussamik illuatungeriit peqatigiillutik piginnittuuneq pillugu isumaqatigiissusiussapput.
Itigartitsisinnaatitaanermut malittarisassat, aqutsisut katitigaanerat, iluanaarutissatut naatsorsuutigisinnaasat danskillu naalagaaffiata Namminersorlutillu Oqartussat akornanni saqitsaannernik aaqqiissuteqarnissamut malittarisassat piginnittuuneq pillugu isumaqatigiissummi ilaatigut aalajangersarneqassapput. Piginnittuuneq pillugu isumaqatigiissut Naalakkersuisut siulittaasuata danskillu aningaasaqarnermut ministeriata akornanni isumaqatigiinniutigineqassaaq.
AAMMA ATUARUK Selvstyret kan købe statens andel af Air Greenland
Ataasinngormallu isumaqatigiissutigineqartup ilaatut, nunatta Den Nordiske Investeringsbankimut 450 millionit koruunit tungaannut taarsigassarsinissaanut naalagaaffik qularnaveeqqusiissaaq. Naalagaaffiup qularnaveeqqusiinissaa pillugu pissutsit allat aningaasaqarnermut naalakkersuisup danskillu aningaasaqarnermut ministeriata akornanni isumaqatigiissutigineqassapput.
Kingullertullu danskit naalagaaffiat nunatsinnut erniakitsunik 450 millionit koruuninik taarsigassarsititsissaaq. Taasigassartitsinermi pineqartumi pissutsit aningaasaqarnermut ministerip, aningaasaqarnermut naalakkersuisup Kalaallit Airports A/S-illu akornanni isumaqatigiinniutigineqassapput.
Naalagaaffiulli amerlanerussuteqarluni Kalaallit Airportsimi piginneqataasinnaannginnera aalajangerneqareerpoq.
Danmarkip isumaqatigiinniarfigineqarnera aallartereersoq Naalakkersuisut siulittaasuata naalakkersuisoqarfiani pisortap Søren Hald Møllerip ilisimatitsissutigaa.
AAMMA ATUARUK Air Greenlandip nunatsinnit tamakkiisumik pisiarineqarsinnaanini tapersersorpaa
AAMMA ATUARUK Air Greenland skal ejes helt af Grønland
