Air Greenlandip nunatsinnit tamakkiisumik pisiarineqarsinnaanini tapersersorpaa

Piginnittummi ingerlatsiviullu akornanni suleqatigiinneq eqaannerulissaaq, aammalu sinneqartoorutit amerlanerit Nunatsinnit iluanaarutaalissallutik.

Taama oqartoq tassaavoq Air Greenlandimi siulersuisuni siulittaasoq Søren Lennert Mortensen.

Air Greenlandimi piginneqataassutit tamaasa Namminersorlutik Oqartussanit pisiarineqarnissaat, taamaalillutillu kisimiillutik piginnittunngorlutik, Inuit Ataqatigiit siunnersuutigivaat.

Naallu siunnersuut arlaleriarluni eqqartorneqartarsimagaluartoq, siunnersuut suli soqutiginaateqarpoq, kisimillunimi piginnittuuneq eqaannerusumik sulisinnaanermik ammaassissasoq, siulersuisuni siulittaasoq Søren Lennert Mortensen oqarpoq.

- Ingerlatsiviup siunissamut pilersaarutai pillugit piginnittoq ataasiinnaq aperineqartalissaaq. Teknikkimimmi taarsersuinerniit suliassanut allanut piginnittup ataasiinnaap suliarisalissavai.

AAMMA ATUARUK Demokraterne vil undersøge privatisering af Air Greenland

Søren Lennert Mortensen isumaqarpoq maannakkut piginnittuusut Air Greenlandip, SAS-ip danskillu naalagaaffiata suleqatigiinnerat ajunngitsuusoq.

Piginnittulli assigiinngitsut pingasuupput, tamassumalu kingunerisarpaa tamatigut isumaqatigiittoqaannartannginnera.

- Soorunami piginneqataassutsimut isummeriaatsit assigiinngittarput.

Taamaattumik piginnittoq ataasiinnganngorpat suna tamarmi eqaannerulissasoq, siulersuisuni siulittaasoq oqarpoq.

Namminersorlutillu Oqartussat kisimiillutik piginnittuunngorunik taakkuusussaassapput sinneqartoorutinik aqutsisuusussat, taanna oqarpoq.

- Taava sinneqartoorutit ilarpassui Danmarkimukartinnagit kalaallit aaqqissuussaanerisa iluaniiginnassapput. Iluanaarutimmi Kalaallit Nunaanniitiinnarsinnaagaanni nuannissagaluaqaaq, Lennert Mortensen oqarpoq.

AAMMA ATUARUK Air Greenland skal ejes helt af Grønland