D Namminersortunngorsaanissamut isumalioqatigiissitaliortoqarli
-Kikkut oqaramik niuernerpalaartumik ingerlatsinermut Namminersorlutik Oqartussat namminersortuninngaanniit pikkorinnerusut. Demokraatit siulittaasuat Randi V. Evaldsen taama aperaaq.
Air Greenlandimik piginneqatiginnissutit, danskit naalagaaffiannit, SAS-imit kiisalu nunatsinniit pigineqartut, nunatta tamaasa pigilertariaqarai Inuit Ataqatigiit qineqqusaarutigaat.
AAMMA ATUARUK Air Greenland tamakkiisumik pigilertigu
-Ullumikkutut itsillugu iluanaarutit piginneqataasunut agguaanneqareeraangata immitsinnut nunguutipajaartarpugut. Pisinermi akiliutissaq iluanaarutigineqartartunit tiguneqarsinnaavoq taamaalillunilu sinerissami pitsanngorsaanissaq inerisaanissarlu aningaasaliiffigineqarsinnaalissapput.
Inuit Ataqatigiit siulittaasuata tullia Aqqaluaq B. Egede taama tunngavilersuivoq. Tamatumunngali Demokraatit isumaqataanngillat, apeqqutinilu taama annertutigisuni misissuilluaqqaartoqarnissaa inassutigaat.
Ineriartorneq aningaasarsiornerlu perusukkaanni allatut eqqarsarnissaq aamma pisariaqarnerarpaat, tassanilu Namminersorlutik Oqartussat suna tamaat pigisariaqanngikkaat erseqqissaatigalugu. Matumani pisariaqartinneqartoq tassaanerarpaat namminersortunngorsaanissamut isumalioqatigiissitaliornissaq, taannalu piginnaanilinnik, misilittagalinnik kiisalu nunatsinnut unammillernermut ilisimalinnik inuttalersorneqarsinnaasutut takorloorpaat.
AAMMA ATUARUK Demokraatit qineqqusaarnermi periuseq nutaaq atorniaraat
-Nunatsinnut taama pingaaruteqartigisumut ullormiit ullormut asuli aalajangiiginnartoqarsinnaanngilaq, matumanimi angallanneq eqqartorneqarpoq. Aalajangiinerit tunngaveqarluartumik aallaaveqartariaqarmata misissuilluaqqaartoqartariaqarpoq, ullutsinnut naleqqillugu ajornerusumik inissittoqannginnissaa pillugu.
