IA Air Greenland tamakkiisumik pigilertigu

Air Greenlandimi piginneqataassutit, nunatta aamma danskit naalagaaffiannit kiisalu SAS-imit pigineqartut, ullumikkutut itsillugu inerisarniakkani, soorlu kiffartuussinissamut isumaqatigiissutitigut atortulersuutitigullu nunatsinnut akimmisaartitsisartut Inuit Ataqatigiinni siulittaasuata tullia oqarpoq. Taamaammat piginneqatigiissutit tamarmik nunatta pigilertariaqarnerarpai.

-Ullumikkut killiffitta takutippaat ajortumut killissimasugut, piginneqateqarluni ingerlatsinerput inerisaaniarnitsinnut aporfissalersuingaatsiarpoq. Air Greenlandip inuiaqatigiinnit tamakkiisumik pigisassanngortinneratigut pitsanngorsagassagut nammineq aalajangersarsinnaalissavavut, oqariartorfissat maannakkutut pingasuunatik ataasiinnanngussammata. Iluanaarutaasartut angallannermi pitsanngorsaanermut atorsinnaanngussavavut, sorusunnerluta allat apereqqaarnagit aalajangersaasinnaalissalluta, Aqqaluaq B. Egede oqarpoq.

Piginneqatigiissutsit tamaasa nunatsinnit pissarsiarineqarnerisigut ajornartorsiutit qaangerneqarsinnaasut aamma isumaqarpoq:

-Ullumikkutut itsillugu iluanaarutit piginneqataasunut agguaanneqareeraangata immitsinnut nunguutipajaartarpugut. Iluanaarutinik pissarsineq imminut akilersinnaavoq, ingerlatseqatigiiffiup tamakkiisumik pisiarinissaanut. Pisinermi akiliutissaq iluanaarutigineqartartunit tiguneqarsinnaavoq sinerissamilu pitsanngorsaanissaq inerisaanissarlu aningaasaliiffigineqarsinnaalissapput.

AAMMA ATUARUK Air Greenland IA-mit aamma Siumumit isornartorsiorneqartoq

Air Greenlandimi piginneqatigiissutsit qaqugu tiguneqarsinnaaneranut tunngasoq Aqqaluaq B. Egedep massakkut akisinnaanngikkallarpaa, tamanna partiinut allanut isumaqatigiinniutigineqaqqaartariaqassammat.