Air Greenland IA-mit aamma Siumumit isornartorsiorneqartoq

Air Greenlandip ukiup aallartinnerani timmisartumi attartugaani saqisut ilaat naammaginanngitsunik akissarsiaqartinneqarlutillu, sulinerminni naammaginanngitsunik atugassaqartinneqartarnerat politikerinit sakkortuumik isornartorsiorneqarpoq.

Sulisunut atugassaritat akissarsialutsitsinerlu suliffeqarfinni Namminersorlutik Oqartussanit pigineqartuni akuersaarneqassanngitsoq Inuit Ataqatigiit Siumullu isumaqarput.

- Tusagaq narrujuummernartorujussuuvoq, aamma ilisimasariaqarparput nunatsinni timmisartuussisarnermi uagut nunarput aamma piginneqataammat, taamak ittunik pissutsinik atugaqartitsilersimassagutta kialluunniit akuerisinnaanngilaa, Siumup politikkikkut oqaaseqartartua Jess Svane taama oqarpoq.

Bendt B. Kristiansen isumaqataavoq.

- Sulisartut pisinnaatitaaffiinik malinninnani taamatut atuisimaneq sakkortuumik isornarineqartariaqarpoq, periutsillu taamaatut nunatsinni suliffeqarfiup atussanngilluinnarpai, Air Greenlandimilu siulersuisut uparuarneqartariaqarput qisuariarfigineqarlutillu.

Air Greenlandip ukiup aallartinnerani timmisartumi attartugaani saqisut ilaat qaammammut 3800 koruuninik akissarsiaqartinneqarlutillu, sulinerminni naammaginanngitsunik atugassaqartinneqartartut nittartakkami Luftfart.nu-mi allaaserineqareersorlu taama qisuariartoqarpoq.

AAMMA ATUARUK Air Greenlandimi paarlattaasut akissarsialutsitaasut

Air Greenland Namminersorlutik Oqartussanik 37,5 procentinik piginneqataaffigineqarpoq, sulisunullu taama atugassaqartitsisoqarnera politikkerinit sakkortuumik isornartorsiorneqarpoq.

- Sulisut pitsaanngitsumik atugaqarpata taava Air Greenland pisussaavoq attartornermi qulakkeerinnissallutik, Jess Svane oqarpoq.

Air Greenlandimi pisortaanerup Jacob Nitter Sørensenip erseqqissaatigaa,  Air Greennland CSR pillugu politikkeqartoq, tamannalu aqqutigalugu sulinermi pitsaasunik atugaqartussaatitaasartut.

Pisortalli Hifly-mik suleqateqarneq ajornartorsiutissaqarsorinngilaa, Hilfymermiullu uppernarsaanerat naapertorlugu suliat taamaattut pillugit politikkeqarnerarlugit.