Air Greenlandimi paarlattaasut akissarsialutsitaasut
Air Greemlandip timmisartuutileqatigiiffik suleqatigisartagaa Portugalimeersoq januaarimiit marsip tungaanut attartormassuk taakku sulisui qaammammut 3800 koruunit ataallugit akissarsiaqartinneqarput ullorlu ataasiinnaq periarfissaqartinneqarlutik soraarsitaariaannaallutik.
Timmisartuutileqatigiiffik pineqartoq tassaavoq Hi Fly, taakkulu sulisut taartaasartut atortagaat Singaporemi allaffeqarfilik aqqutigalugu sulilersinneqartartunut atugassarititaasut ajorluinnartuusut sulisut kattuffiiniinit nalilerneqarpoq.
- Hi Fly-imi sulisut atugassarititaannut isumaqatigiissutaasartut qiviassagutsigit naammaginanngerluinnarput)) Thilde Waast timmisartuni inuttaasut kattuffianni FPU-mi ilaatigut Danmarkimi Nunatsinnilu sulisunut kattuffiusumi siulittaasoq oqarpoq.
Pissutsillu tamakku qaqilerneqartalermata Air Greenlandip pisortaata Jacob Nitter Sørensenip Hi Fly attaveqarfigai, pissutsillu ilumoornersut paasiniarlugit.
- HiFly-imi sulisut atorneqartartut suliffeqarfik sulisunik pilersuisartoq aqqutigineqartarsimasoq uppernarsivara, sulisunulli tassani atugassarititaasut qanorittuunersut suli iluamik uppernarsivillugu tusagaqarfiginngilakka, taamaattumillu ilumut sulisunut atugassaritaasut pissusissamisoornersut oqaaseqarfigisinnaanagu, Jakob Nitter Sørensen oqarpoq.
AAMMA ATUARUK Air Greenlandip timmisartorsua atortutigut akornuteqartoq
FPU-mili siulittaasup isumaa naapertorlugu Air Greenlandermiut akisussaaffik tigunerusariqaraluarpaat.
Suliffeqarfik sulisunut iluamik atugassaqartitsiviusoq Air Greenlanditut ittoq suleqateqarniaruni taava suleqatiginiakkaminni sulisunut atugassaritaasut suuneri eqqumaffiginerusimasariaqaraluarpaa.
Air Greenlandilli pisortaata iliuuserisinnaasimasani tamakkereersimanerarpai:
- Suliffeqarfiit suleqatigisatta inatsisit atuuttut aallaavigalugit sulinissaat soorunami uagut kissaatigaarput, taamaammat Hi Fly-ip pisortaa attaveqarfigaara suliffeqarfigiaannilu atugassaritiaasut ilumut ajunnginnersut aperalugu. Atugassarititaasullu ajunnginnerariarmagit taava una pisup pillugu annertunermik iliuuseqaqqissinnaajunnaarpunga.
Hi Fly-imili susoqarnersoq Jacob Nitter Sørensenip malinnaavigiinnarniarnerarlugu KNR-imut oqaatigaa, soorlu uagut taamaasiorniartugut.
AAMMA ATUARUK Narsarsuaq mittarfittut Air Greenlandimit atorneqarusunngilaq
