Narsarsuaq mittarfittut Air Greenlandimit atorneqarusunngilaq
Narsarsuaq Kujataanut isaavittut ullumi atorneqarpoq, Qaqortumili mittarfeqalerneratigut tamanna allanngortinneqassaaq.
- Taamaalisoqarneratigut nunap iluani angallannikkut Qaqortumut toqqaannartumik angalasalissaagut, aamma nunap iluani angallatavut amerlanersaat Qaqortumukartuusarput, Air Greenlandip pisortaanera Jacob Nitter Sørensen taama oqarpoq.
Narsarsuarmi mittarfiup, amerikamiut 1941-mi sakkutooqarfiliormatali atuutilersup ingerlatiinnarnissaanut toqqammavissaq taamaalilluni peeruttussaassaaq.
AAMMA ATUARUK Narsarsuup siunissaa pillugu misissuisussamik suleqatigiissitaliortut
Nunaqarfik periarfissagissaartoq
Qaqortup Kujataani pingaarnertut mittarfinngorneratigut Narsarsuup siunissaa pillugu ulluni kingullerni isumasioqatigiittoqarpoq.
Mittarfiup siunissaata nalorninartoqalernera peqatigiiffiup "Bevar Narsarsuaq"-p paasisimavaa, taamaakkaluartorli nunaqarfiup siunissaqarnera peqatigiiffiup qularutiginngilaa.
- Narsarsuup ullumikkut uummataa tassaavoq, mittarfeqarfittut ingerlanera. Mittarfeqarfipput peerneqarpat allamut saariarfissaq tassaavoq, takornariaqarnermik ineriartortitsinissaq. Tassa taanna takorluugarput. Aamma tamanna siunissaq eqqarsaatigalugu tamanna periarfissaqarluartoq takorlooratsigu, Storch Lund, Bevar Narsarsuaq"-meersoq taama oqarpoq.
AAMMA ATUARUK Narsarsuarmi innuttaasut ernumapput
Narsarsuarmi siunissami sunik periarfissaqarneranik misissuisussamik suleqatigiissitaliornissaq isumasioqatigiinnermi peqataasunit isumaqatigiissutigineqarpoq.
Attaveqaqatigiinnermullu naalakkersuisoq naapertorlugu, nunaqarfiup qanoq pinissaanik inaarutaasumik aalajangertoqannginnerani arlalinnik misissugassaqarpoq.
- Qulaajagassat assigiinngitsorpassuupput, mittarfinnut tunngassuteqartut, Narsarsuarmut tunngassuteqartut siunissamullu takorluukkanik assigiinngitsunik qanoq piviusunngortitsisinnaanissamut tunngassuteqartut. Taavalu aamma aserfallatsaaliinermut tunngassuteqartut qulaajagassallu assigiinngitsorpassuit annertuut, Erik Jensen, kommuni inuussutissarsiortullu sinniisui peqatigalugit isumasioqatigiinnermi peqataasoq taama oqarpoq.
Narsarsuarmi mittarfik arlaatigut ilusilerlugu attatiinnarnissaanik inerniliisoqassappat, Air Greenlandip nunaqarfimmut siunissami timmisartuussisarnissani mattutivissunngilaa.
- Niuernikkut akilersinnaasut angallavigisarpagut, Narsarsuarlu mittarfittut atorneqarsinnaaginnassappat niuerfimmi suut piumaneqarnersut misissussavarput, Air Greenlandip pisortaanera Jacob Nitter Sørensen taama oqarpoq.
