Narsarsuup siunissaa pillugu misissuisussamik suleqatigiissitaliortut

Kommune Kujallermi Borgmesterip, Kiista P. Isaksenip Attaveqaqatigiinnermullu Naalakkersuisup, Erik Jensenip isumaqatigiissutigaat, siunissami qaninnermi politikkikkut aqutsisoqatigiinnik taakkulu sulisitassaannik suleqatigiissitamik pilersitsisoqassasoq.

Suleqatigiissitaq ingerlatsinikkut attaveqaqatigiinnikkullu kujataanut tunngasunik paasissutissanik katersissaaq qulaajaassallunilu, pingaartumik Narsarsuup siunissami inissisimanissaa pillugu suliaqassalluni.

- Siunissami attaveqaqatigiinnerup ilusissaa pillugu siunnerfiit pingaaruteqarput, suliamullu attuumassuteqartut tamarmik tusaaneqarput, maannakkullu killiffitsinni piviusorsiortumik anguneqarsinnaasunik attaveqaqatigiinnermut tunngatillugu siunnerfeqarnissarput piffissanngorpoq, Kommune Kujallermi borgmester Kiista P. Isaksen oqarpoq.

AAMMA ATUARUK Narsarsuarmi innuttaasut ernumapput

Suleqatigiissitaq politikkikkut sulinermut pisariaqartitsinermi tapertaasassaaq 2018-illu naannginnerani qulaajaanermi paasisat pillugit politikkikkut aqutsisoqatigiinnut nalunaarusiussalluni.

Isumasioqatigiinnermi peqataasut ilaatigut tassaapput:
Narsarsuarmi innuttaasut inuussutissarsiornermillu ingerlataqartut, Attaveqatigiinnermut Naalakkersuisoq, Aningaasaqarnermut Akileraartarnermullu Naalakkersuisoq, Nunaqarfimmi aqutsisut, Kommunalbestyrelsemi ilaasortat, Mittarfeqarfiit aamma Air Greenland.