Akerliusut sakkortuuliornerat Kim Kielsenip nuanniilliutigigai
Kim Kielsen Facebookimi quppernermini ima ilaatigut allaaserisaqarpoq:
- Ataasinngornermi pisut sorpassuartigut inuttut misigisaqarfiupput. Siullermik nuannaarutigaara isumaqatigiissut atsiorsimaleratsigu, maannalu suliaq taanna inatsisartunut ingerlateqqitassanngorlugu apuunneqarmat. Inatsisartut sulilluarnissaannik kissaappakka.
- Ippassarli (ataasinngormat, aaqq) pisut nuannersuinnaanngillat. Tamat oqartussaaqataanerisa aqqani akerliussutsimik takutitsisoqarpoq. Tamanna ataqqilluinnarpara. Taamaattorli akuersaarsinnaanngilluinnarpara akerliussutsimik takutitsisoqarnerani ilaatigut inuttut nakkarsaanermik siunertaqarluni pissusilersortoqarmat, Kim Kielsen oqarpoq, nangillunilu:
- Akerliussutsimik takutitsinermi ilaatigut annoraara peeqqullugu suaartarneqarpunga, tassagooq kalaaliunnginnama. Aamma allaat kaammattuisoqaraluarpoq politiinngooq najuuttut ikeqimmata ujaqqanik milloorneqassasunga. Aallaallumi nivinngagaanissannik oqaluttoqaraluarpoq. Uannut pissusilersuutigineqartut saniatigut ministeriuneq angerlaqqullugu suaartarneqarpoq.
AAMMA ATUARUK Qinnuuloortunngortippaatigut
- Soorunami kalaaliulluni allaat annoraaq peeqqullugu suaartarneqarluni misigissutsikkut attortinnarpoq. Annerinerpaasarali tassaavoq meeqqaat isiginnaartoralugit tusarnaartoralugillu pissusilersuutit taama ittut saqqummiunneqarmata, siulittaasoq oqarpoq.
Partii naleqqap aaqqissugaanik akerliussutsimik takutitsisut annoraara peqquullugu suaartalermata, aamma politiinngooq ikeqimmata ujaqqanik milloorneqarnissara kaammattuutigineqalermat akerliussutsimik takutitsinermik aaqqissuisut qisuarianngillat - tamanna suaartaatigineqartunik akuersaarnertut isigisariaqarpara!
Tamat oqartussaaqataanerat illersugassaraarput - tamannalu pissuserissaarluta inoqatitsinnik nakkarsaanata ataqqeqatigiilluta atortariaqarparput.
- Tamat oqartussaaqataaneranni illersugaavusi - aamma uanga!
Ataatsimoorluta eriagisigu!
AAMMA ATUARUK Koalitionspartnere støtter dansk håndsrækning
Akerliussutsimik takutitsinermi oqaatsit sakkortuut nikarsaasinnaasullu atorneqarnerat Partii Naleqqamit akuersaarneqanngitsoq, Partii Naleqqap siulittaasuata Hans Enoksenip tusagassiuutinut marlunngornermi nalunaarutigaa.
