Erik Jensen: Siumumi avissaartuuttoqanngilaq
Kim Kielsenimmi naalakkersuisut siulittaasuattut inissisimanera tapersersorlugu, Erik Jensenip oqaatigaa:
- Soorunami. Tassa, naalakkersuisut siulittaasuuvoq, aamma Siumumi siulittaasuuvoq, taamaattumik allamik aalajangertoqarnikuunngilaq, aamma avissaartuutsitsiniarnermik arlaatigut oqariartuuteqartoqanngilaq, Aalisarnermut, Piniarnermut Nunalerinermullu naalakkersuisoq Erik Jensen oqarpoq.
AAMMA ATUARUK Løkkemut isumaqatigiissut Erik Jensenip Naalakkersuisuni taperserumanngikkaa
Partii Naleqqap naalakkersuisoqatigiinnit aninerata kingunerisaanik Kim Kielsen tatisimaneqarpoq, mittarfiillu pillugit Siumup partiiata iluani avissaartuuttoqarluni.
AAMMA ATUARUK Kielsen naalakkersuisooqatigiinnik nutaanik pilersitsiniassasoq
Kim Kielsenip mittarfiliortiternissanut Danmarkip aningaasaleeqataanissaannut isumaqatigiissummik ataasinngormat atsioqatigiissuteqarnera isumaqatiginagu naalakkersuisut ataatsimeetigiinneranni nalunaarsorneqarsimagaluartoq, tamanna ajornartorsiutitut Erik Jensenip isiginngilaa:
- Tassani suliaqarsimaninni paasisimasakka aallaavigalugit, kingunerisinnaasai aallaavigalugit taamatut aalajangersimavunga, taamaattumillu tapersiisinnaananga. Kiffaanngissuseqarfigalugu, kiisalu aamma sumiiffiga imaluunniit sumiunera aallaaviginagu, kisiannili inuttut aalajangiisinnaassusera aallaavigalugu taamatut aalajangersimallunga, Erik Jensen, Siumumeersoq, oqarpoq.
Siumumi kingullermik siulittaasussarsiortoqarmat siorna tamanna pivoq. Nunatta Qitornaanni maanna siulittaasoq Vittus Qujaukitsoq, Siumup nuna tamakkerlugu siorna ataatsimiinnerani siulittaasussarsiortoqarmat sassarpoq, Kim Kielsenili amerlanerussuteqartunit qinigaalluni.
