Assartuinermut ataatsimiititaliaq pilersinneqassaaq

- Assartuinermut ataatsimiititaliaq pilersinneqariaruni aamma paasiniagassaasa ilagaat nunatta avataaniit aningaasaliisussarsiorsinnaaneq. Attaveqarnermut, Avatangiisinut Aatsitassanullu Naalakkersuisoq Jens B. Frederiksen (D) oqarpoq.

- Qanorluunniit piumatigigaluarutta takusinnaavarput Nunatta karsia ilungersornartorsiortoq. Paasisagut naapertorlugit aoorluuna avataaniit aningaasaliineq periarfissaalluartoq, Jens B. Frederiksen oqarpoq.

Aperaarput ataatsimiititaliaq Namminersornerullutik aamma Namminersorlutik Oqartussat ataatsimiititaliarisarsimasaasa ilagiinnassaneraat.

- Naamik, Transportkommissionimik pilersitsisoqarnikuunngisaannarpoq, aamma Kalaallit Nunaat tamaat isigalugu kisitsisinik periarfissanillu misissuisitanik. Taamaammat asuli suliassaannginniassammat ataatsimiititaliap sulinera killeqartinneqassaaq, nassuiaavoq.

Assartuinermut ataatsimiititaliaq arlaannaanulluunniit attuumassuteqanngitsunik, aningaasarsiornermik ilisimasalinnik ikittunnguanik, inuttalerneqassasoq takorloorneqarpoq. Ataatsimiititaliarlu ukiaru sulilluni aallartikkuni aappaagu juuni 2010-p tungaanut sulisinneqassaaq.

- Taava Naalakkersuisunut saqqummiissaaq. Taamaammat ilimanarsinnaavoq inatsisartut aappaagu ukiaanerani ataatsimiinneranni assartuinermut ataatsimiititaliap suliaanik Naalakkersuisuniit saqqummiisinnaassallulluta, Jens B. Frederiksen oqarpoq.

Erseqqissarpaa Naalakkersuisut maannakkornit itinerusumik suliaqarnissaq angorusukkaat.

- Qimattariaqaratsigu ullormiit ullormut politikkeqarneq, siunissaq ungasissoq isigalugu politikkeqarneq pingaartittariaqarparput.

Assartuinermut ataatsimiititaliornissaq Naalakkersuisooqatigiit akuereqqaassammassuk ataatsimiititaliami kikkut ilaasortaassanersut Jens B. Frederiksenip maannakkuugallartoq oqaatigisinnaanngilai.