Inatsisartut mittarfiliortiternissamut suliaq pingaaruteqartoq siullermeeraat

Nuummi, Ilulissani Qaqortumilu nutaanik mittarfiliortiternerup aningaasalersornissaanut, ingerlatsinissamut sanaartornissamullu inatsisissatut siunnersuut ullumi siullermeerlugu oqaluuserineqassaaq. Inatsisissatut siunnersuut attaveqatigiinnermut atortunut aningaasaliinerit nunatta oqaluttuarisaanerani annersassaanut alloriarneruvoq qitiuvoq.
Allattoq Thomas Munk Veirum
maajip 28-at 2018 12:47

Mittafiliortiternissamut inatsisissatut siunnersuutip siullermeerlugu oqaluuserineqarnissaa pissanngatigineqaqaaq. Tassami attaveqatigiinnerput aaqqissuuteqqinneqassappat, tamanna inuit sumi najugaqarusunnerannut takornariartitsisarnerullu, nunatta aningaasaqarneranut iluaqutaasumik, ineriartornissaanut aalajangiisuussaqaaq.

Inatsisissap siunnersuutip piginneqatigiiffiup Namminersorlutik Oqartussanit pigineqartup Kalaallit Airportsip sulinera sinaakkusissavaa. Kalaallit Airports Nuummi Ilulissanilu mittarfissualiornissamut Qaqortumilu mittarfiliornissamut, taavalu taakkualu ingerlannissaannut inatsisikkut piginnaatinneqassaaq.

Qaqortumili mittarfiliornissaq taassumalu ingerlannissaa Namminersorlutik Oqartussanut suliassanngortinneqarsinnaavoq, siunnersuummi allassimavoq.

Piginneqatigiiffik Nunatta karsianit aningaasanik qassinik pissarsissanersoq, mittarfiliortiternermilu 3,6 milliardit koruunit missaannik akeqassangatinneqartumik aningaasat sinneruttut piginneqatigiiffiup qanoq ililluni pisarsiarissanerai, inatsimmi aamma alajangersarneqarpoq.

Taava aamma Kalaallit Airports mittaffiliortiterusuttunit qanoq ililluni neqerooruteqartitsissanersoq  qanoq ilillunilu suliassiisoqassanersoq inatsimmi allassimassaaq.
Naalakkersuisuusimasut taamani naliliipput, mittarfissat annermik avataanersunit sanaartorneqassasut, taamaammallu inatsisissatut siunnersuummi sulisussat nunani allaneersut qanoq atorneqassanersut aamma isumaliortigineqarpoq.

Kiisalu aamma mittafiliortiterneq mittarfinnillu ingerlatsinissaq namminersorluni ingerlatsinertut, tassalu imminut nappassinnaasumik ingerlanneqassasut. Kisiannili aammat akit naalakkersuisunit akuerineqartassasut, inatsisissatut siunersuummi allassimavoq.

Aamma atuaruk