Tapersersuisut akerliusulluunniit? Mittarfiit pillugit ingerlaaqatigiinnermik takutitsisorpassuusut
Mittarfinnut pilersaarutit Inatsisartuni sisamanngornermi akuerineqarnissaat naatsorsuutigineqarpoq, mittarfiillu Nuummi, Ilulissani Qaqortumilu suliarineqarnerat piviusunngornissaannut alloriarujussuartoqassalluni.
Sanaartortoqangaatsiarnissaannut isummat suliat aallartinneraniilli avissaangasorujussuupput.
Sisimiuni, Kangaamiuni Kangerlussuarmilu akerliusut aqqusertigut arfininngormat ingerlaaqatigiipput.
Naalakkersuisut mittarfiit nutaat sananeqarnerata kingorna Kangerlussuup siunissaa pillugu ersarissumik akissuteqarnissaat akerliussutsimik takutitsisunit kissaatigineqarpoq.
Kujataani akerliussutsimik takutitsinerit assingusut aamma ingerlanneqarput. Narsami ataasinngormat Narsarsuarmilu marlunngormat ingerlaaqatigiittoqarpoq.
Taakku mittarfinnut pilersaarutit nunaqarfinnut marlunnut qulartitsilernerat akerliussutsimik takutitsinerminni oqariartuutigaat.
Mittarfissallu pillugit akerliussutsimik takutitsisoqaannanngilaq. Qaqortumi innuttaasut illoqarfimmi mittarfeqalernissaa qujassutiginiarlugu pingasunngornermi ingerlaaqatigiipput.
Illoqarfiit pingaarnersaanni Inatsisartut mittarfinnut pilersaarutinik pingajussaaneerinissaannut atatillugu ingerlaaqatigiittoqarniarpoq tassani Naalakkersuisuni amerlanerussuteqartut partiillu tapersersuisup tassa Demokraatit akuersinissaat naatsorsuutigineqarpoq.
