KNI kanngunartuliorfiusareertoq piginnittut ataatsimeersualersut

Naatsorsuutit kukkunillit suiaassusikkullu kanngunarsaaneraanerit. KNI arlalinnik ukiuni kingullerni kanngunartuliorfiuvoq. Aqutsisut nutaat ataatsmeersuartunut ullumi sassaqqaarput.

Allattoq Mathies Hvid Toft

oktobarip 08-at 2021 05:37

Nutserisoq Ulf Fleischer

1986-imili KNI pilersinneqarmat 34-eriarluni ataatsimeersuartoqartarnikuuvoq. Ullumili 35-ssaannik ataatsimeersuarneq qaqutigoornerit ilagissagunarpaat.

Ingerlatsivik siornatigut ingerlalluartutut tusaamaneqartoq ukiuni kingullerni arlaleriarluni isornartunik ilungersunartunik arlalinnik aqqusaagaqartarnikuuvoq.

Tamakkua ilagaat ukiuni kingullerni qulini naatsorsuutit annertuunik kukkuneqartarnikuunngippata naatsorsuutit piaaraluni paatsiveerussarneqartarnikuuneri, minnerppaamik miliuuninik koruuninik 50-it 70-illu akornanniittunik inuiaqatiginnut akeqarsinnaapput.

KNI-p quersuaani isornartut - pisimasoq naatsumik

2010-mili KNI-p quersuarniititanik naatsorsuisarnera nalunaarsuisarneralu naatsorsuinermik aaqqissuussatigut kukkuneqarnikuuvoq.
Tamatuma kinguneranik, 2010-miit ukiuni siullerni quersuarmiititat 70 miliuuni koruuninik annertuallaamik nalilerneqarsimapput kiisalu ukiuni kingullerni arfineq marlunni 50 miliuuni koruuninik annertuallaamik nalilerneqartarnikuullutik.
KNI-p naatsorsuinermut aaqqissuussai inuup allannguineratigut kukkunernik pilersitsisimapput, kinali allannguisimanersoq KNI-mit ilisimaneqanngilaq.
Kukkunerup kinguneranik, ingerlatsiviup piginnittutut aningaasaliissutit, decembarimi ukiup affaanut naatsorsuutimini 50 miliuuni koruuninik nalikillisittariaqalissavai.
Kukkunerit kingunerannik KNI naapertorlugu "ingerlatsiviup aningaasaqarnikkut inissisimaneranut ingerlatsinermullu aningaasartuutinut atatillugu sunniuteqassanngillat.”

Ingerlatsiviup quersuarniittuutai ukiorpassuarni piaaraluni qaffasippallaamik nalilerneqarsimapput, kukkunersiuisarfiullu PwC-p misissuineranit naliliineq siulersuisut maanna tigunikuullugu.

Pinerluuteqartoqarsimanersoq - imaluunniit siulersuisut siulittaasuata Lars Borris Pedersen-ip KNR-imut nassuiaaneratut paasissutisanik assigiinngitsunik ilarussuufiousumik qarasaasiarsornermi kukkunerunersoq tamatuma paasinarsisisavaa.

Misissuineq nipangiusimaneqarpoq

Naatsorsuutit annertuunik kukkuneqartarnerisa nalaani allaffissornikkut pisortaasimasoq, Peter Grønvold Samuelsen, pisimasup kinguneranik tunuarpoq.

Aviisimi Sermitsiami taanna aamma piaaraluni annertuumik naatsorsuutinik paatsiveerussaasimasutut unnerluunneqarpoq.

Ukiuni kingullerni pisimasoq pillugu ingerlaavartumik KNI-p siulersuisui piginnittullu Naalakkersuisut pisimasoq pillugu nutaanik paasissutissaqarnersoq, KNR-imit akissuteqarfiginiarneqarnikuugaluarpoq, arlaannaalluunniilli paasissutissanik nutaanik ilannguserusuttaratik.

Tamatumunngali atatillugu nutaanik saqqummiissoqarnissaa, ullumi ataatsimeersuarnermi naatsorsuutigineqarpoq.

Lars Borris Pedersen tunuarnissani kissaatigimmagu aamma nutaamik siulittaasussarsiortoqassaaq.

Kinguaassiuutitigut kanngutsaatsuliortarnerit ilungersunartut unnerluutigineqartut

Ukiunili kingullerni ingerlatsiviup milliardikkaanik kaaviaartitsisup naatsorsuutitigut isorineqarnera kisimi aalassassimaarutaanngilaq.

Pisortaasimasup kinguaassiuutigut kanngutsaatsuliortarsimaneri ilungersunartut unnerluuutigineqarneri aamma alassassimaarutaapput.

Tamakkua ima ilungersunartigisutut isigineqarput allaat pisortaasimasoq politiinut unnerluutigineqarnikuulluni, taamaammallu taassuma eqqartuunneqarnissani naatsorsuutigisariaqarlugu. Taassuma pisortaanerata nalaani arnat arlallit KNI-mi atorfeqarsimasut, pisortarinikuusartik kinguaassiuutitigut kanngutsaatsuliorsimasutut unnerluutigaat.

Arnat taakkua ilaata KNR-imut oqaluttuaraa, nammineq kissaatiginngiaminik pisortarisami ivigimmigut attuualaarsimagaani.

AAMMA ATUARUK KNI-p innimiilliortoqartarneraaneq eqqartuussissuserisunut avataaneersunut misissoqqugaa

- Taamatut iliornera iluarinagu oqarfigigaluaranni illaatigiinnarpaanga, arnaq taanna oqarpoq.

Taanna arnaq suliffeqarfiup HR-afdelingimi sulisunut isumaginnittoqarfik saaffigaa. Arnalli oqaasii naapertorlugit, tamanna iluaqutaangaanngilaq:

- KNI-mi atorfillit nukittuujusariaqartut oqarfigineqarpunga. Qanorlu iliuutsit akuerisinnaanagillu nuannarinngikkukkit sooq tassani sulinersunga aamma apeqqutigineqarpoq, arnaq taanna oqarpoq.

Peter Grønvold Samuelsen-ip unnerluussutinut tamanut pinngitsuunerarpoq.

Jeppe Jensen juulimi KNI-mi pisortanngorpoq. Taassuma atorfininnerata kingorna, sulisunut sullissivimmi HR-chef Mikol Poulsen, illuatungeriit isumaqatigiinnerisigut tunuartoq, septembarimi ingerlatsivimmit nalunaarutigineqarpoq.

Tamatuma saniatigut naatsorsuuserinermi pisortaq Per Jensen maajimili soraarsitaavoq.