Tusagassiorfik: KNI-ip pisortarisimasaa eqqartuussivimmut sassartinneqassaaq

Unnerluussissussaatitaasut qaammatini pingasuni pineqaatissinneqarsimasunut inissiisarfimmiitsitsisoqarnissaa piumasaraat.

Sermitsiaq.AG taama allaaserisaqarpoq.

AAMMA ATUARUK KNI-p innimiilliortoqartarneraaneq eqqartuussissuserisunut avataaneersunut misissoqqugaa

Peter Grønvold Samuelsen pissutsini tallimani arnanit arlaqartunit KNI A/S-imi suliffeqartunut suliffeqarsimasunulluunniit kannguttaatsuliorsimanermut tunngasuni unnerluutigineqarpoq. 

Kannguttaatsuliornerit suliffeqarfimmi suliffeqarfimmullu atatillugu angalanermi ilaatigut 2016-imi pisimapput.

Sermitsiaq.AG naapertorlugu pissutsit tamarmik tusagassiorsiup allagaatinik takunnissinnaaffigilersimasaani Peter Grønvold Samuelsenip arnat timaani assigiinngitsuni sattaarsimagai allasimavoq.

Arnat Peter Grøvold Samuelsen ukioq manna marsimi unnerluutigaat.

KNI-p pisortarisimasaata eqqartuussivimmi sassartinneqarnera Eqqartuussiveqarfik Qeqqani decembarip ulluisa aallaqqaataani aappaanilu ingerlanneqassaaq.

AAMMA ATUARUK KNI-mi sulisuusimasoq: Tununninngaanniit ivianngikkut attuuavaanga

Peter Grønvold Samuelsen martsip naanerani taanna suliffimminit soraarpoq.

KNI-mi innimiilliortoqarsimaneraanerup saniatigut allamik ukiaq aamma kusanaatsuliorfiuvoq. Tamannalu taamanikkut pisortap politiinut unnerluutigineqarneranik ilaatigut kinguneqarpoq.

Tassami KNI quersuarmiittuutiminik ukiuni arlalinni 50-70 millionit koruunit tungaannut nalitunaarisarsimavoq. Tamanna Namminersorlutik Oqartussat piginneqatigiiffiutaata maannamut 50 millionit koruunit tungaannut nalilinnik annaasaqarneranik kinguneqarpoq.

Peter Grønvold Samuelsen piginneqatigiiffimmi ukiuni arfineq-marlunni akisussaasuuvoq. Taassumali, aqutsisut allat KNI-illuuunniit kukkunersiuisuisa avataaneersut quersuarmiittuutit millionilikkaanik nalitunaarneqartarsimanerat arajutsisimavaat.

KNI-imi aqutsisut siulersuisullu suliaq taanna tamanut novembarimi saqqummiunneqarmalli pisuussuteqannginnerarput.