KNI-p innimiilliortoqartarneraaneq eqqartuussissuserisunut avataaneersunut misissoqqugaa

KNI-p innimiilliortoqartarneraaneq eqqartuussissuserisunut avataaneersunut misissoqquaa.

KNI pisortaasimasoq kannguttaatsuliorsimasutut marsimi unnerluutigineqareersorlu taama aalajangerpoq. Pisortaasimasoq KNI-p qullersaqarfiani sulinermullu atatillugu ilaatigut 2016-imi angalanerni kannguttaatsuliortarsimaneragaavoq. 

Pisortaq, Peter Grønvold Samuelsen, soraartoq, KNI marsip ulluisa 29-nni nalunaarpoq. 

AAMMA ATUARUK KNI-mi pisortaanikoq kannguttaatsuliorsimasutut politiinut unnerluutigineqartoq

- KNI-mi politikkerineqartut suliffiullu iluani najoqqutassat, sulinermi pitsaasunik atugassaqartitsinissamik qulakkeerutaaniartussaasut, misissoqqissaarneqassapput. Whistleblowerimik aaqqissuussineq qanoq pitsaatiginersoq atorluarsinnaatiginersorlu ilanngullugit nalilersorneqassaaq.

- Tassa sulinermi atukkat taavalu pasitsaassaqarnermi nalunaarutiginnissinnaaneq pillugit malittarisassat sulisunut paasissutissiissutigineqarluarsimanersut, erseqqissuunersut paasiuminarnersullu nalilersorneqassasut, KNI-p siulersuisuisa siulittaasuat Lars Borris Pedersen tusagassiuutinut nalunaarpoq.

Aasaanerani sulinngiffeqarfiutinnagu naammassissagaat

Eqqartuussissuserisut ilumut innimiilliortoqartarsimanersoq aamma misissussavaat. KNI-p siulersuisui tigussaasunik inassuteqarfigineqarlutillu siunnersuuteqarfigineqassasut isumaavoq. 

- KNI suliffigalugu toqqissisimanartuussaaq – tamanna assortorneqarsinnaassanngilaq, Lars Borris Pedersen tusagassiuutinut allappoq. 

- Sulianut innimiilliornermut tunngasunut suleriutsivut sulinermilu atukkat pitsaasuunissaannik qulakkeerinninnissarput maannakkut misissuiffigillualerlugulu arlaannaannulluunniit attuumassuteqanngitsumik nalunaarutiginnissinnaanermut periutsip atukkatta siunertaminut atorluarsinnaanersoq aamma misissorniarparput. Qaffasissumik qaffasinngitsumilluunniit atorfeqaraanni KNI-mi sulineq toqqissisimanartuusussaavoq – tamanna uagutsinnut pingaarnerpaavoq, siulittaasoq allappoq. 

AAMMA ATUARUK KNI-mi sulisuusimasoq: Tununninngaanniit ivianngikkut attuuavaanga

- Periutsit ukiualuit matuma siorna atulersitavut atuutsinniarnerat pitsaavallaarpasinngillat. 

Eqqartuussissuserisut Bech Bruunikkut misissuissapput. 

Misissuinertik aasaanerani sulinngiffeqarfiutinnagu naammassissagaat, Lars Borris Pedersen neriuppoq. 

Quersuarmiittuutit pillugit kusanaatsuliaq

KNI-mi innimiilliortoqarsimaneraanerup saniatigut allamik ukiaq aamma kusanaatsuliorfiuvoq. Tamannalu taamanikkut pisortap politiinut unnerluutigineqarneranik ilaatigut kinguneqarpoq.

Tassami KNI quersuarmiittuutiminik ukiuni arlalinni 50-70 millionit koruunit tungaannut nalitunaarisarsimavoq. Tamanna Namminersorlutik Oqartussat piginneqatigiiffiutaata maannamut 50 millionit koruunit tungaannut nalilinnik annaasaqarneranik kinguneqarpoq.

AAMMA ATUARUK KNI-mi pisortaq: Killissamik qaangiisimaguma utoqqatserujussuarpunga

Peter Grønvold Samuelsen piginneqatigiiffimmi ukiuni arfineq-marlunni akisussaasuuvoq. Taassumali, aqutsisut allat KNI-illuuunniit kukkunersiuisuisa avataaneersut quersuarmiittuutit millionilikkaanik nalitunaarneqartarsimanerat arajutsisimavaat.

KNI-imi aqutsisut siulersuisullu suliaq taanna tamanut novembarimi saqqummiunneqarmalli pisuussuteqannginnerarput.