KNI-mi pisortaq: Killissamik qaangiisimaguma utoqqatserujussuarpunga
Peter Grønvold Samuelsen, ukiut arfineq-pingasungajaat atareerluni KNI-mut pisortaajunnaaqqammersoq, arnanit arlaqartunit suliffeqarfimmut atassuteqartunit kannguttaatsuliorsimasutut unnerluutigineqaqqammerpoq.
Arnat taakku KNR-miit attavigineqarlutillu politiinut unnerluutiginnissimanermut uppernarsaataat takuneqarput. Tassani KNI-p qullersaqarfiani sulinermullu atatillugu angalanermi ilaatigut 2016-mi kannguttaatsuliorsimanerit pisimapput.
AAMMA ATUARUK KNI-mi pisortaanikoq kannguttaatsuliorsimasutut politiinut unnerluutigineqartoq
Ippassaq ataasinngornermi Peter Grønvold Samuelsen pisoq pillugu oqaaseqanngilaq – ullumili marlunngornermi KNR-imut ima allappoq:
- Aallaqqaasiutigalugu erseqqissassavara suliffeqarfimmi sulisunik killissamik qaangiilluni qaninnguuiniartarneq nikassaanerillu akerlerigakkit. Paarlattuanimmi sulisut pisortaqatigisimasakkalu erseqqissaavigiuarsimavakka suliffeqarfiup iluani immitsinnut ataqqeqatigiittussaasugut, inuullu kialluunniit imminiussusianik innarliiniartussaanngitsugut.
- Ajuusaarlungalu utoqqatserpunga kimulluunniit killissaanik qaangiillunga innimiilliorfiginnissimassaguma pissusilersornikkut oqaatigisimasakkulluunniit, Peter Grønvold Samuelsen e-mailikkut allappoq.
Qaangiisumik qaninniarnermillu siunertaqarsimanngitsoq
- Erseqqissassavara, nammineerlunga paasinninnera inuttullu suleqatinnut pissuseqarninni killissaanik qaangiisumik qaninniarnermik siunertaqanngisaannarsimagama. Kinguaassiutaasigut attuillunga qeerliisimanngisaannarpunga, imaluunniit allatut attuualaariniarsimanngisaannarlunga qaninniarnermik siunertalimmik. Suleqatinnut suliffimmi suliffiulluunniit avataani attaveqaatitigut attaveqarniarsimanngisaannarpunga, qaninniarnermik siunertalimmik.
Kisianni taamaakkaluartoq suliffimmi ikinngutaalluartuunerarpoq.
AAMMA ATUARUK KNI-p pisortaa soraartoq
- Sulifigisimasanni arnat angutillu ilaanni tuiisigut attorlugit ilassisarsimavakka. Tamanna naliginnaasuuvoq, allatullu isumaqartinneqarani, taamaallaat inussiarnisaarnermik.
- Aamma illaqatigiittarneq atugaasorujussuuvoq. Oqaluttuat nuannersut suliffimmi unikaallassimaarnermi nerrivik kaajallallugu annissorneqartarput, tamanna suliffeqarfippassuarni atugaavoq. Tamakku ilaanni quianartussarsiornerit tupigusuallatsitsiniaqattaarnerit pisarput. Oqaatsit ilaanni oqaluttuallu annissorneqartut kinguaassiutilerinermut tunngasuusinnaasarput, arnat angutillu oqaasertalersortagaat. Uangali oqallinnerni taama ittuni peqataasimaguma oqarsimagumaluunniit inunnut ataasiakkaanut tunngatitaasimanngisaannarput.
- Taamatulli misigisimatitsisimassagaluaruma assut ajuusaarutigaara taamatullu misigisimasoq utoqqatserfigalugu. Suleqatinnummi innimiilliornissaq siunertarinngisaannarsimavara.
Pissuserissaarfiusumik quianartorsiortarnerit oqaasertalersueriaatsillu
- Kingullertigut suliffeqarfigisimasanni suliniutigitilerlugu aallartissimasama ilagaat ukiorpassuarni suliffeqarfiit iluini, suleqatigiinnermi ileqqulersuutaasartut nalitsinnut tulluarsassallugit, ilaatigut makku eqqarsaatigalugit: Sexisme, torersumik oqaloqatigiinnerit, pissuserissaarfiusumik quianartorsiortarnerit, oqaasertalersueriaatsit ingutsinerillu.
- KNI quersuarmiittuutiminnik nalunaarsuinermini naatsorsuinerminilu ukiuni qulini kukkujuartarsimavoq.
- Tassa imaappoq: 2010-miit ukiuni pingasuni quersuaarmiittutit naleqassusaat 70 millionit koruuninik amerlavallaagaapput, ukiunilu kingullerni arfineq marlunni 50 millionit koruuninik amerlavallaagaalutik.
- Kukkuneq KNI-p naatsorsueriaasianut nalunaarsuineranit allaaveqarpoq, kikkulli kukkuluttorsimanersut KNI-p oqaatigisinnaanngilaa.
- Tamanna suliffeqarfiup nammineq pigisaata 50 millionit koruuninik ukiup qiteqqunnerani decembarimi naatsorsuusiornermi ikilineqarnerannik kinguneqassaaq.
- Kukkuneq suliffeqarfiup aningaasaqarneranut, tamatumani ingerlatsinermi angusaanut, KNI-meersut oqarnerat naapertorlugit sunniuteqangaarnavianngilaq
Arnanit arlaqartunit suliffeqarfimmut atassuteqartunit kannguttaatsuliorsimasutut unnerluutigineqarnermi saniatigut, ukioq kingulleq ukiassami KNI-mi kusanaatsuliortoqarpoq:
Peter Grønvoldip soraarneranut suna pissutaanersoq naluarput.
Ingerlatseqatigiiffiup nammineq aningaasaataasa 50 millionit koruuninik ikilineranik kinguneqartoq, KNI-p ukiup affaanut naatsorsuutaani tallimanngormat saqqummertumi allaqqavoq. Taamaalilluni ingerlatseqatigiiffik 50 millionit koruuninik annaasaqarpoq.
Peter Grønvold Samuelsen ingerlatseqatigiiffimmut ukiuni arfineq marlunni akisussaasuuvoq. Taassuma, aqutsisut KNI-illuuunniit kukkunersiuisuisa illup avataaniittut millionilikkaanik kukkuneq arajutsisimavaat.
Ukioq kingulleq novemberimi suliaq aallartimmalli tassunga tunngatillugu KNI-mi pisortat siulersuisullu pinngitsuunerarput.