KNI-mi pisortaanikoq kannguttaatsuliorsimasutut politiinut unnerluutigineqartoq
Peter Grønvold Samuelsen, KNI-mut pisortaajunnaaqqammersoq, arnanit arlaqartunit suliffeqarfimmut atassuteqartunit kannguttaatsuliorsimasutut unnerluutigineqaqqammerpoq.
Arnat taakku KNR-miit attavigineqarlutillu politiinut unnerluutiginnissimanermut uppernarsaataat takuneqarput. Tassani KNI-p qullersaqarfiani sulinermullu atatillugu angalanermi ilaatigut 2016-mi kannguttaatsuliorsimanerit pisimapput.
- KNI quersuarmiittuutiminnik nalunaarsuinermini naatsorsuinerminilu ukiuni qulini kukkujuartarsimavoq.
- Tassa imaappoq: 2010-miit ukiuni pingasuni quersuaarmiittutit naleqassusaat 70 millionit koruuninik amerlavallaagaapput, ukiunilu kingullerni arfineq marlunni 50 millionit koruuninik amerlavallaagaalutik.
- Kukkuneq KNI-p naatsorsueriaasianut nalunaarsuineranit allaaveqarpoq, kikkulli kukkuluttorsimanersut KNI-p oqaatigisinnaanngilaa.
- Tamanna suliffeqarfiup nammineq pigisaata 50 millionit koruuninik ukiup qiteqqunnerani decembarimi naatsorsuusiornermi ikilineqarnerannik kinguneqassaaq.
- Kukkuneq suliffeqarfiup aningaasaqarneranut, tamatumani ingerlatsinermi angusaanut, KNI-meersut oqarnerat naapertorlugit sunniuteqangaarnavianngilaq
Pisortaajunnaaqqammertumut KNR-miit ulloqeqqata-tungaaniit sianerlutalu SMS-erfigaarput, oqaaseqartinnissaali suli iluatsinngilaq.
Peter Grønvoldip soraarneranut suna pissutaanersoq naluarput.
Peter Grønvold Samuelsen atorfimminit soraarpoq, martsillu naanerani suliunnaassalluni.
- Ukiut arfineq-pingasut angungajallugit KNI-miinnerma kingorna, suleqatikkalu aningaasaqarneq aalajaatsoq suliffeqarfik imminut akilersinnaasoq qulakkeersimavagut, isumaqarpungalu akisussaaffiup nukinnut nutaanut ingerlateqqinnissaa maannakkut piffissanngorsimavoq, Peter Grønvold tusagassiuutinut oqarpoq.
AAMMA ATUARUK KNI-p pisortaa soraartoq
- KNI-mi qullersaaneq pissanganartuusimavoq kisianni aamma suliaavoq piumasartooq. KNI-miissimanera nuannarisimavara piumasaqaatillu tunniunneqartut ataanni angusarisimasagut tulluusimaarutigaakka.
- Ilikkagaqarsimaqaanga aamma aaqqissuussinerni suliffeqarfimmillu aqutsinermik misilittagaqalersimavunga, neriuppunga taakku ataqatigiinni allani atorsinnaassallugit. Ilaquttannut piffissaqarnerulissaanga nunatsinnilu pinngortitarsuaq tupinnartoq ilorrisimaarutigissavara.
Peter Grønvold Samuelsen KNI pillugu politiinut ukioq kingulleq suliassiisoqarmat eqqissiviilliortoqarpoq.
Ingerlatseqatigiiffiup nammineq aningaasaataasa 50 millionit koruuninik ikilineranik kinguneqartoq, KNI-p ukiup affaanut naatsorsuutaani tallimanngormat saqqummertumi allaqqavoq. Taamaalilluni ingerlatseqatigiiffik 50 millionit koruuninik annaasaqarpoq.
AAMMA ATUARUK KNI-mi quersuarmiittuutit naatsorsorneri 2008-mili kukkuneqartut
Peter Grønvold Samuelsen ingerlatseqatigiiffimmut ukiuni arfineq marlunni akisussaasuuvoq. Taassuma, aqutsisut KNI-illuuunniit kukkunersiuisuisa illup avataaniittut millionilikkaanik kukkuneq arajutsisimavaat.
Ukioq kingulleq novemberimi suliaq aallartimmalli tassunga tunngatillugu KNI-mi pisortat siulersuisullu pinngitsuunerarput.
