KNI-p pisortaa soraartoq
Peter Grønvold Samuelsen atorfimminit soraarpoq, martsillu naanerani suliunnaassalluni.
Taartissaanik KNI pissarsiuleruttorpoq.
- KNI quersuarmiittuutiminnik nalunaarsuinermini naatsorsuinerminilu ukiuni qulini kukkujuartarsimavoq.
- Tassa imaappoq: 2010-miit ukiuni pingasuni quersuaarmiittutit naleqassusaat 70 millionit koruuninik amerlavallaagaapput, ukiunilu kingullerni arfineq marlunni 50 millionit koruuninik amerlavallaagaalutik.
- Kukkuneq KNI-p naatsorsueriaasianut nalunaarsuineranit allaaveqarpoq, kikkulli kukkuluttorsimanersut KNI-p oqaatigisinnaanngilaa.
- Tamanna suliffeqarfiup nammineq pigisaata 50 millionit koruuninik ukiup qiteqqunnerani decembarimi naatsorsuusiornermi ikilineqarnerannik kinguneqassaaq.
- Kukkuneq suliffeqarfiup aningaasaqarneranut, tamatumani ingerlatsinermi angusaanut, KNI-meersut oqarnerat naapertorlugit sunniuteqangaarnavianngilaq
- KNI-mi qullersaaneq pissanganartuusimavoq kisianni aamma suliaavoq piumasartooq. KNI-miissimanera nuannarisimavara piumasaqaatillu tunniunneqartut ataanni angusarisimasagut tulluusimaarutigaakka. Ilikkagaqarsimaqaanga aamma aaqqissuussinerni suliffeqarfimmillu aqutsinermik misilittagaqalersimavunga, neriuppunga taakku ataqatigiinni allani atorsinnaassallugit. Ilaquttannut piffissaqarnerulissaanga nunatsinnilu pinngortitarsuaq tupinnartoq ilorrisimaarutigissavara.
KNI A/S-ip siulersuisunut siulittaasua, Lars Borris Pedersen, tassunga atatillugu siulersuisut sinnerlugit ima oqaaseqarpoq:
- Peter, ukiuni kingullerni arfineq-pingasuni KNI-mut sulissussisimanera pillugu annertuumik qutsavigerusupparput. Suliffeqarfik KNI, Peter 2014-imi atorfininneranit pitsaanerusumik inissisimapput. Maannakkut taartissaanik pissarsiorpugut, taassuma Kalaallit Nunaannut pisiniartartutsinnullu iluaqutaasumik KNI suli pitsaanerulersinniassavaa.
Quersuarmiittuutit pillugit mamianartuliamut politiinut suliassanngortinneqartoq
Peter Grønvold Samuelsenillu soraarneranut annertunerusumik oqaaseqanngilaq.
Peter Grønvold Samuelsen oqaaseqartinniarlugu KNR sulissuteqarpoq.
Peter Grønvold Samuelsen KNI pillugu politiinut ukioq kingulleq suliassiisoqarmat eqqissiviilliortoqarpoq.
AAMMA ATUARUK KNI-p pisortaanera quersuarmiittuutit pillugit mamianartuliamut ajuusaarpoq
Ingerlatseqatigiiffiup nammineq aningaasaataasa 50 millionit koruuninik ikilineranik kinguneqartoq, KNI-p ukiup affaanut naatsorsuutaani tallimanngormat saqqummertumi allaqqavoq. Taamaalilluni ingerlatseqatigiiffik 50 millionit koruuninik annaasaqarpoq.
Peter Grønvold Samuelsen ingerlatseqatigiiffimmut ukiuni arfineq marlunni akisussaasuuvoq. Taassuma, aqutsisut KNI-illuuunniit kukkunersiuisuisa illup avataaniittut millionilikkaanik kukkuneq arajutsisimavaat.
Politiinut suliassanngortitsineq oqseqarfigerusunngikkaa
Ingerlatseqatigiiffimmi siusinnerusukkut kukkunersiuinermut pisortaallunilu siunnersortaasup, Hans Peter Lynge-Larsenip, Peter Grønvold Samuelsen peqquserluttuliornermi akisussaasutut aviisimi Sermitsiami allaaserisani arlalinni unnerluutigaa.
KNI peqquserlunneraaneq pillugu politiinut nalunaarutigineqarsimanera Peter Grønvold Samuelsenip innersuussutigaa.
AAMMA ATUARUK Múte KNI pillugu: Taama pisoqartussaanngikkaluarpoq
- Pisuutinneqarneq taamaattoq nikarnarsaanermillu annertuumik aallaaveqartoq oqaaseqarfigissanngilara, politiit misissuinerat ingerlatillugu, Peter Grønvold Samuelsen decembarip arfineq-pingajuanni KNR-imut oqarpoq.
Ukioq kingulleq novemberimi suliaq aallartimmalli tassunga tunngatillugu KNI-mi pisortat siulersuisullu pinngitsuunerarput.
Peter Grønvold Samuelsen Air Greenlandip novemberip 12-iani ukioq kingulleq siulersuisuuneranut ilaasortanngorpoq.
