Múte KNI pillugu: Taama pisoqartussaanngikkaluarpoq

Inuit Ataqatigiit siulittaasuat ingerlatseqatigiiffimmi Namminersorlutik Oqartussat pigisaanni mamianartuliamik pisoqartussaanngikkaluartoq isumaqarpoq.
Inuit Ataqatigiit siulittaasuata ingerlatseqatigiiffiup nalingata apparnera sumik peqquteqarnersoq inuiaqatigiit paasisariaqaat isumaqarpoq. Assi © : KNI
decembarip 09-at 2020 04:57

Illuatungiliuttut Inuit Ataqatigiit siulittaasuata, Múte Bourup Egedep KNI-p quersuarmiittuutaasa nalitunaarneqartarsimanerat ilungersunartutut nalilerpaa. Piginnittullu, tassa Namminersorlutik Oqartussat, pisumut oqaaseqartariaqaraluartut isumaqarpoq.

- Ingerlatseqatigiiffiup ulluinnarni ingerlanneqarnera akuleruffiginngikkaluarlugu piginnittut, tassalu inuiaqatigiit kalaallit, sinnerlugit oqartariaqarput: Pisut ima ittut pisussaanngikkaluarput, Múte Bourup Egede KNR-imut oqarpoq.

AAMMA ATUARUK KNI-p pisortaanera quersuarmiittuutit pillugit mamianartuliamut ajuusaarpoq

Inuit Ataqatigiit siulittaasuata ingerlatseqatigiiffiup nalingata apparnera sumik peqquteqarnersoq inuiaqatigiit paasisariaqaat isumaqarpoq.

- Taamaammat Inuit Ataqatigiinninngaanniit oqariartuuteqarsimavugut arlaannut attuumassuteqanngitsumik misissuisoqartariaqartoq. Misissuisoqartariaqarneralu tunngaveqartoq piginnittut tassalu inuiaqatigiit kalaallit ilisimasariaqarmassuk pigisamik, tassalu KNI-p, massakkut nalinga minnerpaamik 50 millionit koruuninik appartinneqarnera sumik tunngaveqartumik taamatut killiffeqarsimanersoq, Múte Bourup Egede oqarpoq.

KNI-mi quersuarmiittutit pillugit kusanaatsuliaq - suliaq naatsumik
  • KNI quersuarmiittuutiminnik nalunaarsuinermini naatsorsuinerminilu ukiuni qulini kukkujuartarsimavoq.
  • Tassa imaappoq: 2010-miit ukiuni pingasuni quersuaarmiittutit naleqassusaat 70 millionit koruuninik amerlavallaagaapput, ukiunilu kingullerni arfineq marlunni 50 millionit koruuninik amerlavallaagaalutik.
  • Kukkuneq KNI-p naatsorsueriaasianut nalunaarsuineranit allaaveqarpoq, kikkulli kukkuluttorsimanersut KNI-p oqaatigisinnaanngilaa.
  • Tamanna suliffeqarfiup nammineq pigisaata 50 millionit koruuninik ukiup qiteqqunnerani decembarimi naatsorsuusiornermi ikilineqarnerannik kinguneqassaaq.
  • Kukkuneq suliffeqarfiup aningaasaqarneranut, tamatumani ingerlatsinermi angusaanut, KNI-meersut oqarnerat naapertorlugit sunniuteqangaarnavianngilaq.

Misissuisoqalerporlu. KNI-p siulersuisuisa kukkunersiuisarfik arlaannaanulluunniit attuumassuteqanngitsoq, Tuluit Nunaanni angerlarsimaffeqartoq PwC suliamik qulaajaassasoq ataasinngormat nalunaarutigaat.

 

AAMMA ATUARUK KNI millionilikkaanik kukkunermini allamik misissuititsilertoq

 

Ukiup affaanut naatsorsuutini kingullerni tallimanngormat saqqummertuni, KNI-p nammineq pigisai 50 millionit koruuninik aqutsisut nalikillivaat, taamaaliornikkut suliffeqarfissuaq nalissavimmisut naleqalersinniarlugu.

KNI Naalakkersuisut siulittaasuata naalakkersuisoqarfiata akisussaaffigaa. KNR-ip Naalakkersuisut siulittaasuat, Kim Kielsen, mamianartuliaq pillugu siusinnerusukkut apersorumagaluarpaa. Taannali arlaannaanulluunniit attuumassuteqanngitsut misissuineranni oqaaseqarusunngitsoq, allattaa allakkatigut akivoq.

AAMMA ATUARUK Kim Kielsen KNI pillugu kusanaatsuliamut akuliukkumanngikkallarpoq

- Saaffiginnissutissinnut qujanaq. Pisoq pillugu Naalakkersuisut siulittaasuat malinnaaqqissaarpoq, kisianni arlaannaannulluunniit attuumassuteqanngitsunit misissuisoqarnerani oqaaseqarusunngilaq, Kim Kielsenip allattaa Angutinnguaq Tittussen, mailikkut KNR-mut allappoq.