KNI millionilikkaanik kukkunermini allamik misissuititsilertoq
KNI-imi aqutsisut isumartik allanngorpaat. Pisorlu tamaat ingerlatseqatigiiffiup quersuarmiittuutaasa kukkusimik nalilerneqarnerat arlaannut akuliusimanngitsumit misissorneqalerpoq. Aqutsisut aallaqqaammut nammineerlutik misissuinertik naammagigaluarpaat.
AAMMA ATUARUK Quersuarmiittuutit naatsorsorneri kukkuneqarujussuartut: KNI-p siulittaasuata qullersat pisuunnginnerarai
Misissuititsilerneq ingerlatseqatigiiffiup siulersuisuini 2018-imiit siulittaasuusup, Lars Borris Pedersenip KNR-imut uppernarsarpaa.
- Toqqortigassaqanngilagut, taamaattumik isertugaqarata ammasumik perusuppugut, siulittaasoq allakkatigut akivoq.
Millionilikkaanik nalitunaaraat
KNI-ip quersuarmiittuutaai ukiuni kingullerni qulini 50-70 millionit koruuninik nalitunaarlugit naatsorsorneqartarput.
- KNI quersuarmiittuutiminnik nalunaarsuinermini naatsorsuinerminilu 2010-miilli kukkujuartarsimavoq.
- Tassa imaappoq: 2010-miit ukiuni pingasuni quersuaarmiittutit naleqassusaat 70 millionit koruuninik amerlavallaagaapput, ukiunilu kingullerni arfineq marlunni 50 millionit koruuninik amerlavallaagaalutik.
- Kukkuneq KNI-p naatsorsueriaasianut nalunaarsuineranit allaaveqarpoq, kikkulli kukkuluttorsimanersut KNI-p oqaatigisinnaanngilaa.
- Tamanna suliffeqarfiup nammineq pigisaata 50 millionit koruuninik ukiup qiteqqunnerani decembarimi naatsorsuusiornermi ikilineqarnerannik kinguneqassaaq.
- Kukkuneq suliffeqarfiup aningaasaqarneranut, tamatumani ingerlatsinermi angusaanut, KNI-meersut oqarnerat naapertorlugit sunniuteqangaarnavianngilaq.
Aqutsisut kukkunertut malugisimanngisamittut saqqummiuppaat inatsisinillu unioqqutitsisimasoqannginnerarlugu. Aqutsisut ingerlatseqatigiiffiullu ukiorpassusarni kukkunersiuisuisa avataaneersut Deloitte-p pisoq apriilip qaammataanili misissuiffigaat.
AAMMA ATUARUK KNI-mi millioninik kukkusoqarnera: Quersuarmiittuutit kukkusumik nalilerneri angusanut sunniuteqartoq
Kukkuneq kukkunersiuisut KNI-ip aqutsisui assigalugit ukiorpassuarni iluarsisimangilaat.
Arlaannut akuliusimangitsut kikkut misissuisuussanersut Lars Borris Pedersenip maanna oqaatigisinnaanngilaa.
AAMMA ATUARUK KNI-mi millioninik kukkusoqarnera: Quersuarmiittuutit kukkusumik nalilerneri angusanut sunniuteqartoq
- Aallartipallannissaa tamaviaarutigaarput, piffissamilu qaninnerpaami aallartinnissaa naatsorsuutigaarput. Misissuineq qaqagu naammassissanersoq oqaatigisinnaanngilarput, kisianni sukkanerpaamik aallartissaaq, Lars Borris Pedersen KNR-imut allappoq .
