KNI-mi millioninik kukkusoqarnera: Quersuarmiittuutit kukkusumik nalilerneri angusanut sunniuteqartoq

Quersuarmiittuutit nalitunaarneqarsimagaangata ingerlatseqatigiiffiup angusai aamma qaffasittartut, naatsorsuuserinermut professori oqarpoq. KNI-p angsai taamaalillutik quersuarmiittuutit naatsorsorneranni millionilikkaanik kukkeqarnerannit sunnerneqassapput.
Allattoq Mathies Hvid Toft, Helle Nørrelund Sørensen
novembarip 28-at 2020 11:47

Quersuarmiittuutit kukkusumik naatsorsorneqarpata tamanna suliffeqarfiup ukiumut angusaanut kinguneqassaaq.

Copenhagen Business Schoolimi naatsorsuuserinermut professori, Kim Klarskov Jeppesen taama oqarpoq. Taassuma KNI-mi naatsorsuinerlunneq immikkut oqaaseqarfiginagu naatsorsueriaasiinnaq pillugu oqaaseqarpoq.

AAMMA ATUARUK KNI-mi quersuarmiittuutit naatsorsorneri 2008-mili kukkuneqartut

- Quersuarmiittuutinik nalitunaarivallaarneq sinneqartoornerlu imminnut attuumassuteqarluinnarput. Nalitunaarivallaarsimagaanni sinneqartooruteqarpallaarnermik aamma kinguneqartarpoq, Kim Klarskov KNR-imut oqarpoq, itisiliillunilu:

- Tassa imaappoq, quersuarmiittuutit 50 millionit koruuninik nalitunaarneqarpallaarsimappata, sinneqartoorutit aamma 50 millionit koruuninik amerlavallaassapput.

KNI quersuaq qaffasippallaamik nalileraa

KNI-p quersuaatiminiittut naatsorsuinermini ukiuni qassiusuni nalituallaartittarsimagai KNR-ip pingasunngormat saqqummiuppaa.

KNI-p siulersuisuinut siulittaasup, Lars Borris Pedersenip oqarnera naapertorlugu kukkuneq pissutigalugu quersuarmiittut 2010-mili nalituallaartinneqartarsimapput. Ukiuni siullerni pingasuni 70 millionit koruunit missaannik.

AAMMA ATUARUK Quersuarmiittuutit naatsorsorneri kukkuneqarujussuartut: KNI-p siulittaasuata qullersat pisuunnginnerarai

Suliffeqarfik quersuarmiittuutit nalinginik qaffaasimappat appaasimappalluunniit tamanna suliffeqarfiup angusaasa inerneranut kinguneqartussaavoq.

Tassa imaappoq, ukiumut angusat qaffaanermi siullermi 70 millionit koruuninik sinneqartoornermik kinguneqassapput.

Millionerpassuit taakku kingorna apparneqarput, quersuullu nalinga ukiuni kingullerni KNI naapertorlugu – 50 millionit missaannik nalitunaarneqartarsimavoq.

Taamaammat appaasoqarnera ingerlatsiviup naatsorsuutaasa inernerinut aamma kinguneqarpoq.

Aamma atuaruk