Ingerlatseqatigiiffissuup KNI-ip, Namminersorlutik Oqartussanit pigineqartup, quersuarmiittuutini ukiorpassuarni nalitunaartarsimavai. Assi: KNI-p Sisimiuni qullersaqarfia.Assi: KNI

KNI-mi quersuarmiittuutit naatsorsorneri 2008-mili kukkuneqartut

KNI-p milliardilikkaanik nalillip quersuarmiittuutai naatsorsorneri ukiuni kingullerni qulini kukkuneqartuartarsimagamik nalitunaarneqartarsimapput. KNI-lli 2008-mi 2009-milu naatsorsuutai aamma kukkuneqartut, naatsorsuutaanik misissuinermi erserpoq.

Kukkuneq ingerlatseqatigiiffissuup quersuarmiittuutaasa 2010-mili nalitunaarneqarnerannik kinguneqartoq, KNI ilisimatitsivoq.

Ukiuni pingasuni 70 millionit koruuninik ukiunilu kingullerni arfineq marlunni 50 millionit koruuninik nalitunaarneqarput.

KNI-p milliardilikkaanik nalillip quersuarmiittuutaasa naatsorsorneri 2008-imili kukkuneqartut, ingerlatseqatigiiffissuup naatsorsuutaanik KNR-ip misissuinerani erserpoq.

AAMMA ATUARUK Quersuarmiittuutit naatsorsorneri kukkuneqarujussuartut: KNI-p siulittaasuata qullersat pisuunnginnerarai

KNI-p taamani kukkunersiuisui Deloittimeersut, Peter A. Wistoft Claus Bechilu, ingerlatseqatigiiffissuup 2008-mi naatsorsuutaani uppernarsiinerminni ima allapput:

KNI-mi quersuarmiittutit pillugit kusanaatsuliaq - suliaq naatsumik
  • KNI quersuarmiittuutiminnik nalunaarsuinermini naatsorsuinerminilu 2010-miilli kukkujuartarsimavoq.
  • Tassa imaappoq: 2010-miit ukiuni pingasuni quersuaarmiittutit naleqassusaat 70 millionit koruuninik amerlavallaagaapput, ukiunilu kingullerni arfineq marlunni 50 millionit koruuninik amerlavallaagaalutik.
  • Kukkuneq KNI-p naatsorsueriaasianut nalunaarsuineranit allaaveqarpoq, kikkulli kukkuluttorsimanersut KNI-p oqaatigisinnaanngilaa.
  • Tamanna suliffeqarfiup nammineq pigisaata 50 millionit koruuninik ukiup qiteqqunnerani decembarimi naatsorsuusiornermi ikilineqarnerannik kinguneqassaaq.
  • Kukkuneq suliffeqarfiup aningaasaqarneranut, tamatumani ingerlatsinermi angusaanut, KNI-meersut oqarnerat naapertorlugit sunniuteqangaarnavianngilaq.

- Aqutsisoqatigiit nalunaarutaanni allaqqaneratuulli nioqqutit nalinginnaasut amerlasuunngorlugillu nioqqutit naatsorsuutinut ilanngunneqarneri uuttorneqarnerilu nalorninartoqarmata nangaanartoqartippavut. Taamaammat qanoq nalorninartiginersut naatsorsoruminaatsipparput, taakku allapput.

Tassa imaappoq, kukkunersiuisut naatsorsuutit akueraat, naatsorsuutilli ilaa akisussaaffiginngikkitsik erseqqissaatigalugu.

Quersuarmiittuutinik ataqatigiissaarinermi nalunaarsuiffittaaq, RCM, ajornartorsiutinut peqqutaasinnaasoq, aqutsisoqatigiit nalunaarutaanni allaqqavoq.

KNI-p RCM atuleramiuk ajornartorsiortorujussuanngorpoq, tamannalu quersuarmiittuutit ingerlatsinerullu nalingisa kukkusumik naatsorsornerannik ilaatigut kinguneqarpoq.

Kukkunerit quersuarmiittuutit nalitunaarneqarnerannik nalikinaarneqarsimanerannilluunniit kinguneqarnersut misissorneqanngilaq.

2009-mi naatsorsuutit aamma kukkuneqartut

Quersuarmiittuutinik ataqatigiissaarinermi nalunaarsuiffiup ajornartorsiutaanera KNI-p 2009-mi aningaasaqarneranut aamma sunniuteqarpoq.

Kukkunersiuisut Deloittemeersut 2009-mi januaarip aallaqqaataaniit marsip ulluisa 31-annut naatsorsuiffiusumi naatsorsuusiani uppernarsaasiinerminni taama allapput. Ukiumut naatsorsuusiorfimmut piffissaliussaq allanngortinneqarmat, taamani ukioq naatsorsuusiorfiusoq sivikinneruvoq.

AAMMA ATUARUK Nunavummi 60-it tunillatsissimasut: Nunavummi naalakkersuisut matusinissamik nalunaaruteqarput

- Aqutsisoqatigiit nalunaarutaanni allaqqaneratuulli nioqqutit nalinginnaasut amerlasuunngorlugillu nioqqutit 2008-imi decembarip ulluisa 31-ianni naatsorsuutinut ilanngunneqarneri uuttorneqarnerilu nalorninartoqartippavut, kingunerisinnaasai ilanngullugit. Taamaammat qanoq nalorninartoqartiginersut naatsorsoruminaatsipparput, kukkunersiuisut uppernarsaasiineranni allaqqavoq.

Tassa imaappoq, kukkunersiuisut naatsorsuutit kukkunersioqqissaarnissaannut paasissutissanik amigaateqarlutik erseqqissaatigeqqippaat.

2010-mi millionilikkaanik nalitunaarneqartut

Kukkunersiuisut arIaannaannulluunniit attuumassuteqanngitsut KNI-p quersuarmiittuutaasa naatsorsorneri 2009/10-mi ukiumoortumik naatsorsuutaani kukkuneqarneraqqippaat. Nangaanartoqannginnerarlugilli quersuarmiittuutai nalitunaarneqarsimasut erseqqissaatigaat.

- Nangaassuteqarnata aqutsisoqatigiit nalunaarutaat qupperneq 10-miittoq innersuussutigaarput. Nioqqutit nalinginnaasut amerlasuunngorlugillu nioqqutit uuttorneqarnerisa naatsorsuutinullu ilanngunneqarnerisa nalorninartoqarnerat nalunaarsukkanullu tunngatillugu 27,8 millionit koruuninik aningaasartalinnik naqqiisoqarsimanera ingerlatseqatigiiffissuup aqutsisoqatigiivisa erseqqissaatigivaat, uppernarsaasiineranni allaqqavoq.

AAMMA ATUARUK Koalitionen indgår snæver finanslovsaftale

Tamanna ukiuni marlunni ajornartorsiutaasimasoq, aqutsisoqatigiit 2010-mi nalunaarutiminni erseqqissarpaat.

- Quersuarmiittuutit, aamma ukioq manna naatsorsuutini, nalingisa kukkusumik naatsornerisa nalorninartoqakkajunnerat paasiuminaatsittorujussuuarput, Søren Lennert Mortensenip pisortaanerunerani aqutsisoqatigiit allapput.

Quersuarmiittuutaasa nalingi 27,8 millionit koruuninik qaffanneqartariaqarsimasut, tamatuma kingorna inerniliussaavoq.

Kukkunerit peqqutigalugit 2010-mi aasakkut nutaamik quersualeriaaseqalissasoq, aqutsisoqatigiit nalunaarutaanni allaqqavoq. Periuserli aamma taanna kukkuneqarnerannik kinguneqartoq, KNR-ip siusinnerusukkut allaatigisaani allaqqavoq. Tassa imaappoq, KNI-p quersuarmiittuutai ukiuni kingullerni qulini nalitunaarneqartarsimapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat