Naalakkersuisoqatigiit kisimiillutik aningaasanut inatsisissaq isumaqatigiissutigigaat
Naalakkersuisoqatigiit aningaasanut inatsisissaq pillugu iluminni isumaqatigiissuteqarput, aningaasanullu inatsisissaq Inatsisartuni amerlanerussuteqaqqartunit taamaalilluni naammassineqassaaq.
Isumaqatigiissut naapertorlugu nunatta karsia aappaagu 76,9 millionit koruuninik amigartooruteqassaaq, tassalu amigartoorut angissamaaraluartoq, aarleqqutasumit minneruvoq.
Tassami 183 millionit koruuninik migartooruteqarnissaq aallaqqaammut siunniussaagaluarpoq - amigartoorutissalli maanna isumaqatigiinniareernermi ikinnerulerput.
AAMMA ATUARUK Inatsisartunut ilaasortat najuuttut tamarmik amigartoornissaq akueraat
Coronammi inuiaqatigiinni aningasarsiornermut suniuutaa aarleqqutaagaluartumit sakkortutigisimanngitsoq, Naalakkersuisut nuannaarutigisinnaasimavaat.
Tassalu aappaagumut aarleqqutaasumit 69,8 millionit koruuninik aningaasarissaaneruvugut.
Sipaarutissat naalakkersuisoqarfinnut arlalinnut eqquissasut
Aningassanut inatsisissaq pillugu isumaqatigiissummi allassimavoq, nunatta karsia ukiuni tulliuttuni sisamani 26,1 millionit koruuninik sinneqartooruteqarnissaa naatsorsuutigineqartoq.
Tamanna ilaatigut sipaaruteqarnikkut anguneqassaaq. Nalakkersuisoqatigiit asssersuutigalugu Ilinniartitanermut Aqutsisoqarfimmi 6 millionit koruuninik sipaaruteqarniarput, taavalu Isumaginninnermut Nalakkersuisoqarfimmi 2 millionit koruuninik aamma Ilinniartitaanermut, Kultureqarnermut, Ilageeqarnermullu Naalakkersuisoqarfimmi 2 millionit koruuninik sipaasallutik.
AAMMA ATUARUK Aningaasanut inatsisissap suliarineqarnera kinguaattoorpoq: Piffissamik pisariaqartitsivugut
Taava amma uuliamik ujarlernermut aningaasaliisutit 2024-p tungaanut ikilisikkiartuaarneqassapput.
Nalakkersuisoqatigiit pisotat ingerlataanni katillugit sipaarutissanik 71,1 millionit koruninik nassaarput.
IA: Nalakkersuisoqatigiit naaperiaajumanngillat
Illua tungiliuttut partiivini annerpaap, Inuit Ataqatigiit, aningaasanut inatsisissami kissaatini akuersaarneqanngitsut ullumi ataasingornermi tusarsimavaa.
- Aningaasaqarnermut Naalakkersuisup oqaasii tunngavigalugit tamanna naalakkersuisooqatigiit kissaatigisimanngimmassuk oqaloqatigiinnerit naaperiarfissaqarsimannginnerat uggoraarput. Tamannalu uppernarsaataaginnarpoq naalakkersuisooqatigiit inuiaqatigiinni atukkatigut naligiinnginnerup annertusiartuinnartup aaqqiiviginissaa pingaarnertut suliarinianngikkaat, partiip siulittasua, Múte Bourup Egede, tusagassiutinut allappoq.
Isumaqatigiissummi atuarneqarsinnaavoq, Nalakkersuisoqatigiit novembarip 18-iani 21-anilu isumaqatigiinniarsimasut sipaarutaasussanillu 20,2 milliuuninit koruuninik nassaarlutik isumaqatigiissuteqarsimasut.