Inatsisartunut ilaasortat najuuttut tamarmik amigartoornissaq akueraat
Tassalu siullermeerinninnermi isornartorsiuisimaqineq partiinit naalakkersuisoqatigiinnit peqataaffigineqartoq nipangertuusigallarpoq.
AAMMA ATUARUK Aningaasanut inatsisissatut siunnersuut 180,7 millioninit amigartoorfiusoq
Naalakkersuisooqatigiit partiivisa Siumut ,Demokraatit, Nunatta Qitornaasalu aningaasanut aappaagu inatsisissaq 180,7 millionit koruuninik amigartoorfiusoq aappassaaneerneqarnerani akuersaarpaat.
Tamatumunngali killinniarneq Naalakkersuisoqatigiinnut ilungersunarsimavoq.
Tassami Inatsisartut aningaasaqarnermut akileraartarnermullu ataatsimiitialiaat Siumumeersumik, Hermann Berthelsenimit siuttuuffigineqartoq amigartoornissamut akuersiumanngissimaqaaq.
AAMMA ATUARUK Naalakkersuisoq: Vi går alligevel efter underskud på næste års finanslov
Maannali Inatsisartut nalunaaquttap akunnerini arfinilinni ataatsimeereerneranni partiit najuuttut ilaasortaatitaat tamarmik akuersaarlutik taasipput.
Piumasaqangaatsiartut
Naalakkersuisoqatigiinnneersulli Siumut Demokraatillu imaaliinnarlutik akuersinngillat.
Aappaagulu 180,7 millionit koruuninik amigartoornissaq Demokraatit akueraat.
- Corona pissutigalugu aappaagu amigartoorujusuarnissaq akuerivarput. Coronaqarani pissutsit allaagaluarpata, akuersaasanngikkaluarpugut. Atukkavulli peqqutigalugit paasinninnermik takutitsivugut. Piumasariinnarparput, aningaasanut ukiuni sisamani tulliuttuni inatsisit oqimaaqatigisitsiffiussasut amigartoorfiunatik, Demokraatineersoq Malene Vahl Rasmussen KNR-imut oqarpoq.
AAMMA ATUARUK Naalakkersuisut skal finde 175 millioner kroner i finanslov
Siumup aappaagu amigartoornissaq aamma akuerigaa, Hermann Berthelsen KNR-imut oqarpoq.
- Aningaasanut aappaagu inatsisissami amigartoornissaq Siumup aamma tunngaviatigut Demokraatitulli akuersaarpaat, ukiunili missingersuusiorfiusuni sisamani oqimaaqatigiisitsinissaq anguniarlugu, Hermann Berthelsen oqarpoq.
Tassalu Aningaasaqarnermut naalakkersuisoq piffissami tullittumi ulapittusanngorpoq. Tassami killiffik taamaakkallartillugu ukiuni tulliuni sisamani amigartoorutissatut 165 millionit koruunik missingiussaapput. Partiillu kissaataat piviusunngussappat taakkua aningaasat ujarneqartariaqarput.