Suut sipaarniarfigilersaarnerlugit oqarumanngilaq, amigartoornissarli suli qularinngilaa.Assi: Christian Sølbeck

Naalakkersuisoq: Aningaasanut inatsisissaq amigartoorfiuinnassaaq

Inatsisartut amigartoorumanatik aningaasanut 2021-mi inatsisissaq septembarip naanerani utertippaat. Naalakkersuisorli aningaasartuutissanut tamanut suli matussutissarsinngilaq.

Aningaasaqarnermut naalakkersuisup, Vittus Qujaukitsup (NQ) aningaasanut aappaagumut inatsisissatut siunnersuut aggutsimi saqqummiuteqqaaramiuk 183 millionit koruuninik amigartoorfiussasoq saqqummiuppaa, ataatsimiititaliallu tamanna isoreqaa, naalakkersuisorlu sipaarniutissanik ujarleqqullugu.

Naalakkersuisulli piumasaqaat suli naammassisimanagu maanna oqarpoq.

AAMMA ATUARUK Aningaasanut inatsisissaq: Naalakkersuisoq ataatsimiititaliamut utaqqisitsisoq

Suut sipaarniarfigilersaarnerlugit oqarumanngilaq, amigartoornissarli suli qularinngilaa.

- Oqaatigisinnaanngilara. Kisianni piumasaqaataasunut annertuumik qanillattorpugut, Vittus Qujaukitsoq oqarpoq.

Tassalu aningaasanut inatsit amigartooruteqarfiussaasoq, naalakkersuisup siunnersuusiornermini suli aallaavigaa.

Inuit atugaat ajorseriassanngitsut

Siunnersortinik avataaniit atuinertik sipaarfiusinnaasutut tikkuarpaa.

Namminersorlutik Oqartussat siunnersortinik avataaneersunik 2018-imi atuinerat 189 millionit koruuninik akeqarpoq, 2019-imilu 284 millionit koruuninik akeqarluni.

Inuilli atugaat ajorseriassanngitsut siunnersuusiornermini aallaavigalugu oqarpoq.

- Tassa sapinngisamik taamatut uuttuuteqarluta sipaarutissanik ujaasivugut, Vittus Qujaukitsoq oqarpoq.

AAMMA ATUARUK Vittus Qujaukitsoq: Aappaagu amigartooruteqarnissaq pinngitsoortinneqarsinnaanngilaq

Aningaasanut inatsisissaq aappaagumut amigartooruteqasagaluarpalluunniit aningaaserivinnut taarsigassarsiniarnissaq Naalakkersuisuni pilersaarutiginngikkitsik, taanna aamma oqarpoq.

Inatsisartut aningaasaqarnermut akileraartarnermullu ataatsimiititaliaat aningaasaqarnermut naalakkersuisup suliaminik saqqummiinissaanut isumaliutissiissusiorniarlutik utaqqiinnartut, siulitatasua Herman Berthelsen (S) sisamangornermi oqarpoq.

Inatsisartut aningaasanut aappaagumut inatsisissatut siunnersuut novembarip 27-ani naammassillugu suliarissavaat.

Aningaasanut inatsisissaq piffissaq eqqorlugu kingullermik 2013-imi akuersissutigineqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat