Vittus Qujaukitsoq: Aappaagu amigartooruteqarnissaq pinngitsoortinneqarsinnaanngilaq

- Nalunngilarput piffissaq immikkuullarissuusoq, immikkut ittumik atugassaqartitaavugut, tamannalu aamma aningaasaqarnikkut aamma qalipaasersueqataassaaq.

Aningaasaqarnermut naalakkersuisoq, Vittus Qujaukitsoq (NQ) Naalakkersuisut aningaasanut inatsimmut siunnersuutaat ataasinngornermi saqqummiukkamiuk oqarpoq.

2021-mi 183,3 millionit koruunit amigartoorutaassapput. Naalakkersuisut aningaasanut inatsimmut tamanna siunnersuutigaat.

Aningaasanut inatsip nunatta aningaasaqarnera ukiuni sisamani assigiiaartumik sinneqartoornermilluunniit takutittussaavaa.

Suliassaq tamanna ajornaatsuinnaasimanngilaq. Nunatsinnimi piffissami aggersumi isertitaqartoqarnissaa pillugu qularnartorpassuupput.

AAMMA ATUARUK Aningaasanut inatsimmut siunnersuutip nutaap politikkikkut ukiami sulineq aallartissagaa

Nunatta aningaasaqarneranut pingaarnerpaaq tassa aalisarneq aalisakkat akiisa appariartornerannit eqqugaaqqavoq.

Sammivilli silarlukkaluarpalluunniit uningatinneqassasoq, Vittus Qujaukitsoq oqarpoq.

- Aningaasarsiornitsinni sammivik silarlukkaluarpalluunniit aalajangiusimassallugu pingaaruteqarpoq – silarlummillu taaneqarsinnaasoq tassaalluni nualluussuup covid-19-ip sunniutigisai allatut iliuuseqarnissamik pisariaqartitsilernikuusoq.

Nunatta karsianut isertitat iluanaarutillu amigaataasut

• Naalakkersuisut angallannermut pitsanngorsaanermi inuussutissarsiutinullu ikiorsiissutinut katillugu 265 millionit koruuninik aningaasartuuteqarnissartik naatsorsuutigaat.
• Namminersorlutik Oqartussat pigisaannit ingerlatseqatigiiffinnit ilunaarutinit 80 millionit koruunit amigaataanissaat naatsorsuutigineqarpoq.
• Aalisarnermit 125 millionit koruuninik isertitakinnerunissaq naatsorsuutigineqarpoq.
• 25 millionit koruunit missaannik akileraarutinit isertitakinnerunissaq aamma naatsorsuutigineqarpoq.
• Naalakkersuisut Mittarfeqarfinnit isertitanit 100 millionit koruuninik amigaateqarnissaq aamma naatsorsuutigaat.

Coronap ilungersunartorsiortitsinera pissutigalugu aningaasartuutit maannamut katillugit 595 millionit koruuniupput.

Taamaaginnarnissaanullu inuussutissarsiornermut ikiorsiissutit septembarip ulluisa 30-anni qaangiuttussat sivitsorneqannginnissaat pisariaqarpoq. Taamaaginnarnissaanullu aamma Namminersorlutik Oqartussat pigisaannut ingerlatseqatigiiffinnut coronamut attuumassuteqartunut aningaasaatinit aningaasaliissuteqartoqannginnissaa piumasaqaataavoq. 

Inuusuttut ikinnerusut siunissami isumalluutissaasut

Tamatuma saniaitgut inuusuttut akileraartarnikkut ikiorsiiteqaasinnaasut ikinnerussapput utoqqaallu akileraarutitigut isaatitsinngitsut siunissami amerlanerussapput.

Innuttaasut amerlinissaannut missingersuutit kingulliit takutippaat inuussuttut ikinneralutik utoqqaat amerlanerussasut. 2020-mit 2040-mut utoqqaat 49 procentimik amerlissapput. Inuusuttut 14 procentimik amerlissapput. Taamaammat sulisinnaasut 14 procentimik ikileriassapput.

- Taamaammat inuusuttut siunissami pisariaqartinneqassapput, aningaasaqarnermut naalakkersuisoq oqarpoq.

Inuiaqatigiinni utoqqaat amerlanerugunik tamanna nunatta karsiata aningaasartuutaanut ilungersortitsissaaq. Peqqinnissaqarnermut angerlarsimaffimmi ikiorteqarnermut utoqqaallu illuinut aningaasartuuteqartoqarnerulissaaq.

Kisianni aamma meeqqat atuarfiinut aningaasartuutini annikitsumik aningaasartuutikinnerusoqaleriartorpoq.

- Ilinniartitaanerup iluani unammillernartoqarpoq. Tamanna ilinniakkap qaffasissusaanut ilinniakkamillu taamaatitsiinnartunut tunngavoq.

Ilinniakkat qaffasissusaat appasipput, taamaatitsiinnartartut amerlapput naammassisaqartartullu ikillutik. Tamanna saniatigut iliuuseqarfigineqassaaq.

Taamaammat ilinniartut amerlanerusut ilinniartinneqassapput, unitsitsiinnartartulli aamma ikilisinneqassllutik.

Kisitsisit naapertorlugit ilinniarnertuunngorniarfinni atuartut 48 procentiisa ilinniagartik unitsiinnartarpaat, inuussutissarsiornermilu ilinniarfinni 64 procentiisa ilinniarnertik unitsiinnartarlugu.