Aningaasanut inatsimmut siunnersuutip nutaap politikkikkut ukiami sulineq aallartissagaa

Naalakkersuisut 2021-mut aningaasanut inatsisissatut siunnersuumminnik ullumikkut saqqummiussereerpata politikkikkut upernaakkut suliaqarneq aallartissaaq.

Vittus Qujaukitsup (NQ) siunnersuut Naalakkersuisut tusagassiortunik naapitsivianni nalunaaqutaq qulinut katersortitsinermi saqqummiutissavaa.

Saqqummiussinermi coronap 2020-mi ilungersunartorsiortitsereernerani aningaasat qanoq amerlatigisut atorneqarsinnaanersut oqaatigineqarnissaat naatsorsuutigineqarpoq.

Naalli ilungersunartorsiorfioreeraluartoq aalajangersimakannertunik inissisimalluartoqarpoq. Danmarkimiimmi naalagaaffiup tapiissutai 4 milliardit koruunit missaat qularnaapput.

Ilungersunartorsiorneq sakkukinnerusoq

Nunarput nunanut allarpassuarnut sanilliullugu peqqissutsikkut aningaasaqarnikkullu eqqugaarujussuanngilaq.

Ikiorsiissutilli, takornariaqarnermit akileraarutitigut iluanaarutit appariartornerat aalisarnermilu akit appariartornerat pissutigalugit aningaasanut inatsisip ukiup siuliani isumaqatigiinniutigineqarneranit aningaasat atorneqarsinaasut ikinnerunissaat qularnanngilaq.

Nunatta karsiani aningaasakinnerunissaata naatsorsuutigineqarnera pissutigalugu naalakkersuisup, Vittus Qujaukitsup politikkikkut suleqatini aningaasanik naleqartussanik siunnersuusiornisssamut tunuarsimaaqqullugit ukioq manna siusinnerusukkut kaamattuuteqarfigai.

Aningaasat qanorpiaq amerlatiginersut suli ilisimaneqanngilaq, maannamulli naatsorsuinerit tamarmik pisortat missingersuutaanni annaasaqartoqangaatsiartoq takutippaat. Tamanna nunatta matusimaneranik ilaatigut pissuteqarpoq.

AAMMA ATUARUK Ikiuinissamut milllionilikkaat suminngaanniissanersut nalunartoq

Tamatuma saniatigut Namminersorlutik Oqartussat inuussutissarsiuteqartunut ikiorsiissutinik pilersitsisariaqarsimapput. Naalakkersuisut ikiorsiissutinik marlunnik milliardit affaannik naleqartunik marsip qaammataani atulersitsipput, taakkuali atoneqarnerat killeqarpoq.

Greenland Businessimit paasissutissat naapertorlugit inuussutissarsirtut ikiorsiissutinit  44 millionit koruuninnassimapput, sulisulli aningaasarsianik annaasaqarnermut ikiorsiissutit qanoq atorneqarsimatiginersut ilisimaneqarani.

Tamatumunnga kisitsisit kingulliit majimeersuupput, taamanilu 3,8 millionit koruunit atorneqarsimapput.

Akileraarutinit akitsuutiniillu aningaasanik isaatitsisut

Ukiunili kingullerni akileraarnerulernermit akitsuutiniillu aningaasanik isaasoqarneruvoq. Namminersorlutik Oqartussat tamakkunannga 114 millionit koruuninik ilunaaruteqarput, tamatumalu kingorna akitsuutit qaffallutik.

AAMMA ATUARUK Aningaasanut inatsit: Sikaritsit, imigassaq, sukkut, sukkulaatit mamakujuttullu akitsorput

Tamanna aningaasanut inatsip siorna isumaqatigiinniutigineqarnerani pivoq, Namminersorlutik Oqartussat tassani assersuutigalugu mamakujuttunut, imigassanut tupanullu qassiiusunik akitsuusiipput. Tamatuma saniatigut ingerlatseqatigiiffiit akileraartarnerat 30 procentimit 25 procentimut apparneqarpoq.

Aningaasanut inatsit tamaani Siumumit, Nunatta Qitornaanit Demokraatiniillu akuerineqarpoq.