Sikaritsit, imigassaq, sukkulaat Naalakkersuisoqatigiit ilaatigut akitsorpaat. Aningaasanummi inatsimmi amigartoorutit matussuserneqartussaapput. Assi: Toqqorsivimmit

Aningaasanut inatsit: Sikaritsit, imigassaq, sukkut, sukkulaatit mamakujuttullu akitsorput

Aningaasanut inatsisissap saqqummiunneqareerneranit akunnialuit qaangiuttut akitsuutit nutaat Inatsisartut pilertortumik suliaralugit akuersissutigaat. Aningaasanummi inatsisip amigartoorutai matussuserneqassapput.

Inatsisartut akitsuutinik nutaanik pilertortumik suliaqareerlutik amerlanerussuteqartut akuersissutigaat. Nutaanik akitsuusersuinerup aningaasanut inatsit oqimaaqatigiissassavaa.

Sikaritsit poortat 20-nik imallit unnuap qeqqaniit koruuninik sisamanik 40 oorinillu akisunerulerput. Sukkut kiilumut 4 koruunit 31 oorinillu akisunerulertut, sukkulaat mamakujuttullu kiilumut koruuninik tallimanik akitsorlutik.

Imigassamut akitsuut imigassap kimittussusaa aallaavigalugu akitsuusersorneqarpoq, tassa procentip qaffakkiartornerani akisuninngoriartortussanngorlugu. Soorlu assersuutigalugu immiaaraq 33 centiliiteri 66 oorinik akisunerulerluni.

AAMMA ATUARUK Tupanut akitsuusiineq aningaasanut inatsisip amigartooruteqarneranut matussusiissasoq

Puussiaaqqat plastikkit aamma akitsuusersorneqarput. Puussiaaraq fem liiteri koruuninik marlunnik akitsuuserneqartoq puussiaaqqat anginerusut tre koruuninik akitsuuserneqarlutik.

Akitsuutit nutaat akuersissutigineqartut pissakinnerusunut eqquinerlussasut Inuit Ataqatigiit Partii Naleqqallu aningaasaqarnermut akileraartarnermullu ataatsimiititaliami ilaasortaatitai isumaqarput.

Illuatungiliuttut: Pissakinnerit eqqugaalerput

Akitsuusersuinikkut 182 millionit koruunit missiliorlugit inuiaqatigiinnit ukiuni tulliuttuni sisamani aaniarneqartut partiit taakku marluk isumaqarput.

- Innuttaasut inuuniarnerannut aningaasarparujorujussuit taakkua isertitakittunut aammalu akunnattunik isertitalinnut sakkortuumik sunniuteqartussaapput, Aqqaluaq Egede oqaluttarfimmit oqarpoq.

Nioqqutissat akitsuutitigut akitsorniarneqartut suliffeqarfinnut akileraarutip apparniarneqarnera illuatungiliuttunit eqqarsarnartoqarpoq.

- Inuiaqatigiit kaasarfiinit aningaasanik aalleqqikkusunngilagut. Akit qaffasereertigisut, Partii Naleqqamit Inatsisartuni ilaasortaq Jens Napatok akitsuutit oqallisigineqarnerini oqarpoq.

Martinussen: Ataqatigiinngillat

Atassut Suleqatigiisitsisullu akitsuusersuiniarneq aamma naammaginartinngilaat.

- Sulinermut ilanngaat atuutilersinneqarnissaa kissaatigineqarpoq aappaatigullu akitsuutit aqqutigalugit aningaasanik utertitsiniartoqarluni. Ataqatigiinngilaq, Suleqatigiisitsisunit Tillie Martinussen oqarpoq.

AAMMA ATUARUK Aningaasanut inatsit sinneqartooruteqalaarluni inissittoq

Sulinermut ilanngaat ukiumut 50 millionit koruunit missaannik naleqassasoq akitsuusersuinikkut 45 millionit koruunit isertinneqarnissaat tunngavilersuutigaa.

Nunatsinni inuit peqqinnerulernissaat akitsuusersuinikkut Naalakkersuisut siunertarigitsik oqaatigaat, aningaasaqarnerulli oqimaaqatigiissarneqarnissaa aamma anguniarneqartoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat