Tupanut akitsuusiineq aningaasanut inatsisip amigartooruteqarneranut matussusiissasoq
Pisiassanut mamartunut peqqinnissatsinnulli innarleeqataasartunut akiliinerusalissaagut.
Naalakkersuisooqatigiit taama isumaqarput, taakkulu tupanut, imigassamut sukkulaatinullu akitsuutit ilaatigut qaffaangaatsiarniarpaat.
Inatsisissatut siunnersuut ‘Peqqinnerulersitsiniarnermut akitsuusiineq’-mik qulequtserneqarsimasoq ataasinngornermi ullaap tungaani saqqummersinneqartoq taama takussutissiivoq.
- Sukkunut, sukkulaatinut mamakujunnullu akitsuutit kiilumut 5 koruunimik qaffassapput.
- Tupanit imigassanullu akitsuutit 10 procentimik qaffassapput
- Puussiat plastikkiusut nutaatut akitsuuserneqassapput, puussiat 5 literinik imakinnerusut 2 koruunimik puussiallu anginerusut 3 koruunimik akitsuuserneqassapput.
- Ussassaarutit pappilissat nunatsinni allakkanut nakkartitsivinnut nakkartinneqartartut nutaatut kiilumut 5 koruunimik akitsuuserneqassapput.
- Qamutinut motorilinnut ATV-nullu akitsuutit januaarip aallaqqaataat 2021-mit atorunnaarsinneqassapput.
Akitsuutit aningaasanut inatsimmut ikiorsiissasut
Akitsuutit ataatsimut nunatta karsianut ukiuni sisamani ukiut tamaasa 45,5 millionit koruuninik iluanaarutaassapput.
AAMMA ATUARUK Sikaritsinik tupanillu akitsuineq peqqinnissaqarfimmut oqilisaassisinnaasoq
Akitsuutillu qaffannerat aningaasanut inatsimmi amigartooruteqarnermut matussuseeqataasussat aningaasanut inatsisissap naalakkersuisooqatigiinnit partiimiillu ikorfartortaasumit, Demokraatinit atsiorneqaqqammernerani saqqummiunneqarput.
Aningaasanummi inatsimmi ingerlatseqatigiiffiit akiliutikinnerunissaat sulinermilu ilanngaatip 2020-mit atulersinnissaannut ilaatigut aningaasartuuteqangaatsiarpoq.
Kielsen: Inuusaaseq pitsaanerulersinneqassaaq
Siunnersuutikkulli nunatta karsiata immernissaata saniatigut, aamma innuttaasut peqinnerulernissaat anguniagaavoq.
Isumaqatigiisuteqartut allapput, peqqinnarnerusumik inooriaaleqalernissaq anguniagaasoq.
AAMMA ATUARUK Aningaasanut inatsit sinneqartooruteqalaarluni inissittoq
Nioqqutissanut soorlu mamakujunnut, sukkunut, imigassanut tupanullu akitsuutit qaffanneqassapput. Aammali puussianut plastikkiusunut ussassaarutinullu akitsuutit nutaat avatangiisinut pitsanngorsaataasussat siunnersuummi aamma ilaapput.
Naalakkersuisut siulittaasuata, Kim Kielsenip inuiaqatigiinni peqqinnissaq siunissami aningaasaqarnermut atatillugu pingaaruteqartoq aningaasanut inatsisissap saqqummiunnerani oqaatigaa.
- Inuusaaserput pitsanngorsartariaqarparput, taamaanngippat peqqinnissaqarfimmut suli aningaasartuuteqarnerulissaagut, Kim Kielsen oqarpoq.
Aningaasaqarnermut siunnersuisooqatigiit: Tupat akisunerusut peqqinnissaqarfimmut oqilisaataasinnaasut
Naalakkersuisut nutaamik akitsuusiinissamut siunnersuuteqarnerminni Aningaasaqarnermut Siunnersuisooqatigiit ukiumoortumik nalunaarusiaat eqqaavaat.
Aningaasaqarnermut Siunnersuisooqatigiit peqqinnissaqarfiit sulisussaaleqisut, utoqqaqarnerusoq nakorsaariaatsillu akisunerusut nalunaarusiaminni septembarimi allaaseraat.
Pujortartarnerup akisunerulersinneqarnissaa Aningaasaqarnermut Siunnersuisooqatigiit siunnersuutaasa ilagaat.
- Pujortartarnermut akiuineq pujortartartullu ikinnerulernissaannut suliniuteqarneq inuit inooriaatsiminnik aallaaveqartumik napparsimalertartut ikinnerulernissaannut sunniuteqarsinnaallutillu inuit ataasiakkaat peqqinnerulernissaannut iluaqutaasinnaapput, aammali peqqinnissaqarfimmut oqilisaassisinnaallutik, aningaasaqarnermut siunnersuisoqatigiit siullittaasuat Torben M. Andersen oqarpoq.
Tupanit pujortagassaniillu allanit akitsuutit maannakkut ukiumut 150 millionit koruunit missaannik pisortat suliffeqarfiinut iluanaarutaasarput.
