Aningaasanut inatsit sinneqartooruteqalaarluni inissittoq

Allaaserisaq nal. 09.40 nutarparparput, oqaaseq ”amigartooruteqarluni” eqqortumik uannga taarserlugu ”sinneqartooruteqarlaarluni”

Naalakkersuisooqatigiit Siumut, Nunatta Qitornai partiillu ikorfartortaasut Demokraatit aappaagumut aningaasanut inatsisissaq isumaqatigiissutigaat.

Aningaasaqarnermut naalakkersuisup, Vittus Qujaukitsup 2020-mut aningaasanut inatsisissaq nutaaq, partiit pingasut isumaqatigiissutigisaat ataasinngornermi ullaap tungaani saqqummiuppaa.

Aappaagumut aningaasanut inatsit ukiuni sisamani 1,7 millionit koruuninik sinneqartooruteqartussatut missingersuuteqarpoq.

Amigartooruteqarneq sinneqartooruteqarninngortoq

- Politikkikkut kissaatit assigiinngitsut akuerineqarnissaat aningaasanullu inatsimmik aningaasaqarnikkut ataqatigiittoqarnissaa ukkatarineqarput, Vittus Qujaukitsoq oqarpoq.

AAMMA ATUARUK Der er fortsat uenighed om finanslov

Aningaasanut inatsimmi makku ilaatigut aningaasanik immikkoortitsiffigineqarput:

• Ingerlatseqatigiiffiit akileraarutikinnerunissaannut 162 millionit koruunit
• Peqqinnissaq pillugu ataatsimiititaliarsuarmut, qanoq peqqinnissamut aningaasanik atuinerusoqarsinnaaneranut misissuisussamut 6 millionit koruunit
• Sisimiut Kangerlussuullu akornanni aqqusinniornissamut pilersaarusiornissamut tapiissutinut 5 millionit koruunit
• Sulinermut ilanngaatit 2020-mit atuutilernissaanut 50 millionit koruunit
• Illoqarfiit minnerit nunaqarfiillu iluarsartuunneqarnissaannut 15 millionit koruunit

Naalakkersuisut siulittaasuata, Kim Kielsenip isumaqatigiissutip iluatsinniarnera ajornakusooraluartoq iluatsinneqarnera nuannaarutigaa:

- Aningaasanut inatsisissap inissinniarnera aallartimmat aningaasanik amigartooruteqarnera pissanganarsimaqaaq. Suliniutinulli assigiinngitsunik aningaasanik nassaarpugut, aningaasaqarnerlu aqunneqarsinnaalluni, Kim Kielsen oqarpoq.

Aningaasanut inatsimmi siunnersuutip aappassaaneerneqarnerani aningaasarpassuit 70,6 millionit koruunit amigaataasut innersuutigineqarput.

Kielsen: Peqqinnissaqarfik aningaasartuuteqarfiunerusinnaasoq

Kim Kielsenip peqqinnissamut susassaqarfik siunissami aningaasaqarnikkut ukkatarineqartussat ilaattut erseqqissaatigaa.

- Inuusaaserput pitsanngorsartariaqarparput, taamaanngippat peqqinnissaqarfimmut suli aningaasartuuteqarnerulissaagut, Kim Kielsen oqarpoq.

Demokraatit siulittaasorigallagaata, Nivi Olsenip isumaqatigiinniarnerit naak unammillernaraluartut aamma nuannaarutigai. Taassuma ingerlatseqatigiiffinnut akileraarutit 162 millionit koruuninik appartinnera erseqqissaatigaa.

- Nunatsinni ingerlatseqatigiiffissuit atugassarititaarnerussapput, taakkuuppummi suliffissanik pilersitsisut, taamaammat taama alloriarpugut, Nivi Olsen oqarpoq.

Assi © : KNR/Ivik Kristiansen

Naalakkersuisut siulittaasuat, Kim Kielsen, aningaasaqarnermut naalakkersuisoq Vittus Qujaukitsoq partiillu ikorfartortaasup Demokraatit siulittaasuata Nivi Olsen 2020-mut aningaasanut inatsimmik atsiortut. Assi: Ivik Kristiansen

Aningaasanut inatsisissap isumaqatigiissutiginissaa tallimanngormat isumaqatigiinngiffiugaluarpoq, tassami illutungiliuttut partiit aningaasanut inatsisissap isumaqatigiinniutigineqarneranit ilaajunnaarput.

AAMMA ATUARUK Illuatungiliuttut aningaasaqarnermut inatsisissamut tapersiinianngillat

Taamaalilluni Vittus Qujaukitsup aningaasanut inatsimmut tapersersuisoqarluarnissaanut naatsorsuutaa eqqortinneqanngitsoorluni. Demokraatilli qinigaatitaasa tapersiineratigut naalakkersuisooqatigiit aappaagumut missingersuummut amerlanerussuteqarput.

Illuatungiliuttut isumaqatigiinniarnermit tallimanngormat tunuarlutik nalunaaruteqarneranni illuatungiliuttut kissaataat aningaasanut inatsisip isumaqatigiinniutigineqarnerani tusaaneqartanngitsut Partii Naleqqamit Suleqatigiissitsisuniillu ilaatigut isornartorsiorneqarpoq.