Aningaasanut inatsisissatut siunnersuummut suli kissaateqartut
Aningaasanut inatsisissatut siunnersuutip aappassaaneerneqarnissaanut allannguutissatut siunnersuutit tamarmik akuersissutigineqassappata, siunnersuut 70 millionit koruuninik amigartooruteqarfiussaaq.
Taakkualu siunnersuutip novembarip ulluisa 14-ianni pingajussaaneernissaanut matussuserneqartariaqassapput.
Partiilli annerit pingasut aningaasanut aappaagumut inatsimmut suli kissaateqarput.
AAMMA ATUARUK Aningaasanut inatsisissamut siunnersuummut akuersissanerlutik oqaatigisinnaanngilaat
Siumut immikkoortunik 36-nik aningaasanut inatsisissatut siunnersuutip siullermeerneqarnerani kissaateqarpoq. Taakkualu akuersissutigineqarnissaat partiip suli neriuutigaa.
- Pingaartitagut siullermeerinninnermi saqqummiunnikuuagut, kisianni aningaasarsiornermut siuariartuutaasinnaasut, taavalu ataatsimut isiginnilluni utoqqarnut allanullu sanngiinnerusunik immaqa taaneqarsinnaasunut aammalu akissaatikinnerusunut atukkat pitsanngornissaat, minnerunngitsumillu sinerissami sanaartorneq annertunerulissasoq, tassa tamakkuupput, uani isumaqatigiinniarnitsinni massakkut ingerlatagut, Siumumeersoq Hermann Berthelsen oqarpoq.
AAMMA ATUARUK Poppel: Siumukkormiut kissaataat qineqqusaarutaarpasipput
Inuit Ataqatigiit inunnut aningaasaliinerunissamik kissaateqarput.
- Tassa siullermik innuttaasunut toqqaannartumik ajorseriaatissat millisarniarlugit kommuninut ataatsimoortumik tapiissutit sipaarniarneqartut taakkua kommuninut utertikkusupparput, taavalu innuttaasunut soorlu inuusuttunut meeqqanullu immikkut suliniuteqarfigineqartariaqartunut aningaasat sipaarneqartut taakkua aningaasaliissutigitillugit utertinniarsarivarput. Peqqinnissaqarfimmut, ilinniartitaanermut isumaginninnermullu sipaarniarnissat itigartipparput. Ataatsimut isigalugu inunnut aningaasaliinerit annertunerusariaqarput, soorlu aamma utoqqalinersianut, Inuit Ataqatigiinneersoq Aqqaluaq B. Egede oqarpoq.
AAMMA ATUARUK Ataatsimiititaliaq: Amigartoorutit matussusernissaannut piffissakippoq
Aamma partii naalakkersuisoqatigiinnut ikorfartuisoq Demokraatit suli isumaqatigiinniuteqarusupput.
00:03:01
- Itisileqqinnaarnianngilara sunarpiaq, kisianni pingaartitagut tassaapput, nunatsinni toqqissilluta inuusinnaasariaqartugut, taavalu aamma meeqqagut toqqissillutik perorsinnaaniassasut. Taakkua aallaavigerpiarlugit sulivugut. Kisianni taakkua inerisassagutsigit suliffeqarfiit nukittuut pigisariaqarpagut aammalu taakku sorsuutigivagut, Demokraatineersoq Nivi Olsen oqarpoq.
