Siumut Aningaasanut inatsisissamut siunnersuummut akuersissanerlutik oqaatigisinnaanngilaat
Aningaasanut inatsisissatut siunnersuut Inatsisartuni ataasinngormat saqqummiunneqarpoq. Nunatta karsia 2020-mi 6,6 millionit koruuninik sinneqartooruteqassasoq, Aningaasaqarnermut naalakkersuisup, Vittus Qujaukitsup naatsorsuutigaa.
Naalakkersuisoqatigiinnili aaaqqiagiinnginnissaq ,Vittus Qujaukitsup ilimagisinnaavaa.
Siumut aningaasanut inatsisissamut isumaqatiginninniarnermi assigiinngitsunik kissaateqarpoq. Kissaataat immikkoortut 36-iupput.
- Oqarsinnaanngilagut akueralugu, kisianni aamma oqarsinnaanngilagut akuerissanagu. Suliassat aatsaat aallartipput, Hermann Berthelsen taama oqarpoq.
AAMMA ATUARUK Aningaasanut inatsisissatut siunnersuut: Aningaasaqarnikkut ilungersunartut arlallit
Nuup avataani pilattorpalaamik kaatarpalaamillu tusaasaqarnerunissaq, Siumup maqaasivaa.
Nunaqarfinni nakorsiartarfeqanngitsuni nakorsiartarfeqalernissaannut aningaasaliinissaq, Tasiilami nutaamik meeqqanut inuusuttuaqqanullu ulloq unnuarlu paaqqinnittarfiliortoqassasoq, Illoqarfinni mikinerni mittarfeeqqat suliaralugit aallartinnissaat Naalakkersuisut pimoorullugu sulissutigissagaat, Sisimiuniit Kangerlussuarmut aqqusinniornissap aningaasalersorneqarnissaa pillugu pilersaarut Qeqqata kommunip peqatigalugu suliaralugu aallartinneqassasoq, Niaqornaarsummi timersortarfeerassap sananeqarnissaa qulakkeerneqasssoq, Nivaap sulluata itisilernissaanut Naalakkersuisut aningaasaliissuteqassasut, Siumup ilaatigut kissaatigaa.
- Uagut isumaqarpugut, aningaasat annerpaartai sumiiffiinnut sineriaat taamaat eqqarsaatigalugu aningaasalersuinissamut atorneqartariaqartut, taamalilluni sinerissami sanaartortut assigisaallu pilersaarusiorluarnissaminnut aamma periarfissaqarniassammata, Hermann Berthelsen taama oqarpoq.
Tassa kissaaterpassuit, nunatta karsianiik aningaasartuuteqarfiungaassasut.
Vittus Qujaukitsulli aningasanut inatsisissatut siunnersuutaa Siumup siunnersuuterpassuinut inissaqartitsigaanngilaq. Nunatta karsia aappaagu 7,1 milliardit koruunit isertitaqarumaartoq, taassuma naatsorsuutigaa. Aamma ukioq taanna 6,6 millionit koruuninik sinneqartooruteqaannarnissaq ilimagaa, taamaammat Siumup kissaaterpassuisa aningaasalersornissaat, Naalakkersuisunut ajornakusuussaaq.
Kissaatillli akissaqartinneqassasut Siumut isumaqarpoq. Ukiuni kingullerni isertat ilimagineqartumit amerlanerusimasut partiip eqqaasitsissutigaa.
- Kialuunniit ilisimavaa, ataatsimut isigalugu nunarput ukiuni makkunani aningasarsiorluartoq, akileraarutitigut isertitat annertunerujussuupput, Hermann Berthelsen oqarpoq.
Nunatta karsiata naatsorsuutai naapertorlugit nunatta karsia 2018-imi 7,5 milliardit koruuninik isertitaqarsimavoq. Taamanga angusaqarneq missingersuinermit, 7,2 milliardit koruuninik isertitaqanissamik ilimasuffiusumit, pitsaaneruvoq.