Poppel: Siumukkormiut kissaataat qineqqusaarutaarpasipput
Kissaataat taakku marluusut siumukkormiut 2020-mut aningaasanut inatsisissatut siunnersuummut tunngatillugu naalakkersuisunut saqqummiussaasa 36-usut ilagaat.
Siumukkormiulli kissaatitik naalakkersuisunut naalakkersuisooqatigisaminnut sooruna saqqummiukkaat?
Birger Poppelip inuiaqatigiinni pissutsit pillugit ilisimatusartutut Ilisimatusarfimmi atorfillip siumukkormiut kissaatiminnik saqqummiussinerat marlunnik nassuiaatissaqarsoraa:
AAMMA ATUARUK Aningaasanut inatsisissamut siunnersuummut akuersissanerlutik oqaatigisinnaanngilaat
- Siullermik oqartoqarsinnaavoq, siumukkormiut iluminni aasaq aalassassimaangaatsiarsimagaluarlutik tunngaviusumik pingaartitami ilai pillugit aalajangiusimanertik kissaatiminnik 36-usunik saqqummiinermikkut inuiaqatigiinnut ersersinniarsarigaat.
- Tamannalu ilutigalugu aappassaanik oqartoqarsinnaavoq, politikkikkut tunngaviusumik pingaartitatik kattuffimminnut naalakkersuisuutitaminnullu nalunaarutiginerisigut politikkikkut killiffimminnik attassiinnarnertik oqariartuutigigaat, Birger Poppel oqarpoq.
Kissaataalli 36-usut aamma immikkuullarissuunnginnerarpai.
- Partiit aningaasanut inatsit pillugu oqallinnerminni aningaasanut inatsisissatut siunnersuuteqarnermikkut tunngaviusumik pingaartitaminnik erseqqissaasarnerat qaqutigoortuunngilaq. Partiit allat kissaatiminnik siumukkormiutulli aamma saqqummiisarput.
AAMMA ATUARUK Aningaasanut inatsisissatut siunnersuut: Aningaasaqarnikkut ilungersunartut arlallit
Kissaatiminnilli 36-usunik qineqqusaarutitullusooq saqqummiussinerat qaqutigoortuuvoq. Kissaataannili pingaarneq nunatsinni ineriartortitsinermut tunngavoq, tamannalu immikkoortorpaalunnik assigiinngitsunik qitiusunillu ilaqarpoq, tamatumalu saniatigut kissaataat 36-usut qassinik aningaasaliiffigineqartariaqarnerannut tunngasunik saqqummiussaqangaanngillat.
Aammali isumaqarpunga, kissaataat naalakkersuinermik, isummersornermik anguniakkanillu aningaasalersorneqanngitsunik politikkikkullumi nalinginnaasumik oqallinnermi - soorlu aningaasanut inatsit pillugu oqallinnermi - tunngavigineqarsinnaasunik aallaaveqartut.
