Inuit Ataqatigiit, Partii Naleraq, Atassut aamma Suleqatigiisitsisut tusagassiortunik tallimanngornermi ullaap tungaani katersortitsipput.Assi: Malik Brøns

Illuatungiliuttut aningaasaqarnermut inatsisissamut tapersiinianngillat

Aappaagumut aningaasaqarnermut inatsisissaq amerlanerussuteqarluartunit taperserneqassanngilaq. Partiimmi illuatungiliuttut sisamat inatsisissamut akerliullutik taasiniarput.

Aningaasaqarnermut naalakkersuisup Vittus Qujaukitsup aappaagumut aningaasaqarnermut inatsisissamut taperserluarneqarnissaminut naatsorsuutigisai piviusunngunngitsoortussanngorput.

Tamanna Inuit Ataqatigiit, Partii Naleraq, Atassut aamma Suleqatigiisitsisut tallimanngornermi ullaap tungaani tusagassiortunik katersortitsereerneranni paasinarsivoq.

Partiimmi taakkua aningaasaqarnermut inatsissap isumaqatigiinniutigineqarneranut iluarinninnatik isumaqatigiinniarnernit maanna anipput.

Partii Naleqqap siulittaasua, Hans Enoksen, naapertorlugu Naalakkersuisut kissaatiminnik kisimi tunniussisinnaasarsimapput, illuatungiliuttuniilli takusaqarumassanatik:

- Isumaqatigiinniarnermi Naalakkersuisut tungaanniit partiit kisimik kissaatiminnik tunniussaqartarput, Hans Enoksen tusagassiortunik tallimanngornermi katersortitsinermi oqarpoq.

AAMMA ATUARUK For sjette år i træk: Finansloven bliver sandsynligvis ikke vedtaget til tiden

Suleqatigiisitsisuniillu aamma taamatukanneq oqariartortoqarpoq:

- Isumaqatigiinniarnerit taama ingerlanneqarneri akuerisinnaanngilagut. Assersuutigalugu inuusuttunut ilinniartunut inissiat aningaasaqarnikkut pitsaasumik aallarnermi immikkut eqqarsaatigineqannginneri akuerisinnaanngilagut, Suleqatigiisitsisunit Tillie Martinussen oqarpoq nangillunilu:

- Naalakkersuisooqatigiit qinersereernerup kingornali pitsaasumik suleqatiginiarsimagaluarpagut. Siornalu qinersisoqareernerani ilaasa ilaatinneqarunnaarnerat ajorinngilarput, kisianni aamma pissutsit tassanili eqqissisimanarnerulersimassangaluarput ikinnerussuteqartullu ataqqineqarnerullutik.

Inuit Ataqatigiit siulittaasuata, Muté Bourup Egedep Naalakkersuisut nunatsinni mittarfinnik atuinermut akitsuusersueriaaseq nutaaq partiimi ukioq manna isumaqatigiinniarnermi aporfiungaatsiarnera ilaatigut innersuussutigaa. Akitsuusersueriaatsip nutaap nunatsinni timmisartumik angalanermut akisunerulersitsivoq tamannalu Inuit Ataqatigiit akerleraat.

AAMMA ATUARUK Borgmesterit aningaasanut inatsisissaq akisussaassuseqannginneraraat

Partiit pineqartut taakku katillutik inatsisartunik 14-nik taasisinnaasoqarput. Naalakkersuisuutitaqartulli Siumumeersut aamma Nunatta Qitornaaneersut Demokraatinit taperserneqarnitik ilanngullugit inatsisartunik 17-inik taasisinnaasoqarput, taamaalillutik partiit taakkua pingasut aningaasaqarnermut inatsisissaq allanik isumaqatigiissuteqanngikkaluarlutik taasissutigisinnaallugu.

Partiit taakkua sisamat aamma teknikkut suleqatigiinnissamik isumaqatigiissuteqarput. Isumaqatigiissutaat naapertorlugu partiit Inatsisartuni ilaasortaatitaasa amerlassusaat naapertorlugit Inatsisartuni ataatsimiisitaliani inissat agguataarneqassapput.

- Partiilli partiitut politikkiminnik suli ingerlatsisinnaatitaapput, Aqqalu Jerimiassen tusagassiortunik tallimanngornermi katersortitsinerminni oqarpoq.

Suleqatigiisitsisut aamma Partii Naleraq aningaasaqarnermut inatsit siorna tapersinngikkaat partiit sinneri akuersillutik taasipput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat