Isornartorsiuineq: Borgmesterit aningaasanut inatsisissaq akisussaassuseqannginneraraat

Borgmesterit tallimat tusagassiuutinut ataatsimoorussamik nalunaarummi aningaasanut inatsisissatut siunnersuut kommuninut tapiissutinik ikilisaaffiuallaarnerarlugu sakkortuumik isornartorsiorpaat.

Naalakkersuisut aningaasanut inatsisissatut siunnersuuteqarnerminni Namminersorlutik Oqartussat isumagisassaasa ilaat kommuninut isumagisassanngortinniaraat Qeqqata Kommuniani borgmesteri, Malik Berthelsen, isumaqarpoq.

- Allaanngilaq aningaasaqarneq ataqatigiittariaqanngitsoq Naalakkersuisunit siunniunneqarsimasoq. Kommunit tamanna isumagiumaarpaat, Malik Berthelsen (S) oqarpoq.

Borgmesteriniillu sisamanit tapersersorneqarpoq.

Kommuninut tapiissutit ikilisinneqaatigalutik suliassat kommuninut tunniunniarneqarniartut borgmesterit iluarinngikkaat tusagassiuutinut allapput.

AAMMA ATUARUK Aningaasanut inatsisissatut siunnersuut sinneqartooruteqarfiusussaq

Assersuutigalugu ineqarnermut tunngasut Namminersorlutik Oqartussaniit kommuninut ukioq manna tunniunneqarnissaat pilersaarutaavoq. Taamatuttaaq Naalakkersuisut kinguaassiuutitigut kannguttaatsuliorfigineqarsimasut pillugit iliuuseqarniarput, tassanilu kommunit arlalinnik piumaffigineqartut, borgmesterit allapput.

Ataqatigiinngitsoqartorli Avannaata Kommuniani borgmesteri, Palle Jerimiassen (S) isumaqarpoq.

- Ukiut qulit sinnerlugit ingerlanerini suliat aningaasartaqartarnissaat isumaqatigiissutigisarsimavarput, kisianni taamaakkunnaarsimarpasippoq. Naalakkersuisut aningaasaqarnikkut akisussaasutut imminnut taakkartorsinnaasut, aningaasartuutit kommuninut ingerlateqqiinnartarunikkit ingasappallaaqaaq, Palle Jerimiassen oqarpoq.

Kommunit ileqqaaruteqarnissaat pingaaruteqartoq Naalakkersuisut inatsisissatut siunnersuutip saqqummiunneqarnerani erseqqissaassutigaat, kommunilli taamaaliortareertut borgemesterit isumaqarput.

- Kalaallit Nunaanni Naatsorsueqqissaartarfimmit kisitsisit ersarilluinnarput. Namminersorlutik Oqartussat allaffissuanni sulisut amerliartorput, kommuninilu sulisut taamaaginnakannerlutik. Namminersorlutik Oqartussat aningaasartuutigisartakkatik qanoq inissisimanersut qimerloornerusariaqarpaat, kommunit aningaasartuutigisartagaannut sanilliussinermikkut, Kommune Kujallermi borgmesteri, Kiista P. Isaksen (S) oqarpoq.