Aningaasanut inatsisissatut siunnersuut sinneqartooruteqarfiusussaq
Aningaasaqarnermut naalakkersuisup, Pele Brobergip aningaasanut inatsisissatut siunnersuut oqimaaqatigiiffiusoq ataasinngormat saqqummiukkamiuk, pisortat aningaasartuuteqarpallaannginnissaat pingaartillugu oqaatigaa.
Siunnersuut 19,6 millionit koruuninik 2019-imi sinneqartooruteqarfiusussatut, taavalu ukiuni 2019-imiit 2022-mut 17,7 millionit koruuninik sinneqartooruteqarfiusussatut missingersuusiorfiulluni. Tassalu aningasanut inatsisissatut siunnersuut oqimaaqatigiiffiuvoq.
- Uani pingaartutut uanga isigivara, ukiuni sisamani sinneqartoornissaq, tassami patajaatsumik aningaasaqarnermut inatsisissap ingerlannissaa nuannaarutigisorujussuuara, Pele Broberg oqarpoq.
Taanna naapertorlugu siunnersuut suliaralugu aallartinneqarmat ukiunut sisamanut milliardip affaanik amigartooruteqarfiusussaagaluarpoq.
- Tassalu milliardit affaanut pitsanngorsaavugut, tamatumalu saniatigut suliassaqarfinni amerlanerni sipaaruteqarnata. Soorlu assersuutigalugu peqqinnissaqarfimmi sipaaruteqanngilagut, akerlianilli. Allaffissornermi IT-mullu tunngasuni sipaaruteqarneruvugut.
69 millionit koruuninik kommuninit naalakkersuisoqarfinniillu nassaartut
Pisortat aningaasartuuteqarpallaarnaveersaarnissaat pingaartillugu Broberg arlaleriarluni oqarpoq, taavalu akinut aamma akissarsianut aaqqigallaatinit aningaasartuutit ilaat amerlisinneqassanngimmata, kommuninit naalakkersuisoqarfinniillu 69 millionit koruuninik nassaartoqarsimasoq ilanngullugu oqarluni.
Kangerlussuup Narsarsuullu innaallagissamik imermillu assigiimmik akeqartitsinermut 2019-imit ilanngunneqarnissaat politikkikkut ilaatigut suliniutini pingaartinneqarpoq. Nunaqarfiit imermik innaallagiamillu assigiimmik akeqartitsinermut siorna atuutilersinneqartumut ilaanngillat.
Tamatuma saniatigut tunngaviusumik inatsisissaq pillugu isumalioqatigiissitamut 2019-imut 2020-mullu immikkoortitsisoqarpoq.
Aamma Pinngortitaleriffiup misissuissutissamik umiarsuartaarnissaanut immikkoortitsisoqarpoq.
Sulinermut ilanngaat 2020-iutinnagu piviusorsiunngitsoq
Naalakkersuisut sulinermut ilanngaammik 2019-imi atuutilersitsiniarnerat naalakkersuisoqatigiinnermut isumaqatigiissummi ilaavoq. Namminersorlutik Oqartussalli IT-kkut atortorissaarutaat ilanngaammik taamaattumik atuutilersitsinissamut piareersarneqaqqaartariaqarmata, ilanngaatip 2020-utinnagu atuutilersinnissaa piviusorsiunngitsoq, siunnersuummi allaqqavoq.
