Ukiut tulleriit arfinilissaat: Aningaasanut inatsit piffissaliussamit kingusinnerusukkut akuerineqartussaarpasittoq
Aningaasaqarnermummi naalakkersuisup, Vittus Qujaukitsup, aningaasanut inatsisip akuersissutigineqarnissaanut piffissaliussap
novembarip ulluisa 21-annut sivitsorneqarnissaanik qinnuteqarpoq. Inatsisit naapertorlugit aningaasanut inatsit kingusinnerpaamik novembarip ulluisa 15-ianni akuersissutigineqartussaagaluarpoq.
Aningaasanut akileraartarnermullu ataatsimiititaliaq aningaasanut inatsisissatut siunnersuutip pingajussaaneernissaanut allannguutissatut siunnersuutit suliarinissaannut piffissakinnerareeraalu kinguartitsiniarpoq.
Aningaasanummi inatsisissatut siunnersuutip aappassaaneerneqarnissaa kinguartinneqareerpoq. Ataatsimiititaliaq naapertorlugu tamanna ataatsimiititaliap apeqqutaanut akissutit piffissaliussaq ullunik 18-inik qaangerlugu tunniunneqarnerannik pissuteqarpoq.
AAMMA ATUARUK Ataatsimiititaliaq: Amigartoorutit matussusernissaannut piffissakippoq
Aappassaaneernissaalut kinguartitsinneqarmat siunnersuummik suliaqarnissamut piffissakinnerulerpoq. Sulinissamullu piffissaqarluartariaqaraluarpoq, aningaasanummi inatsisissatut siunnersuutip aappassaaneerneqarnissaanut 70,6 millionit koruuninik amigartooruteqartoqarpoq.
Aningaasat taakku aningaasanut inatsisissatut siunnersuutip akuersissutigineqannginnerani nassaarineqartussaapput.
Vittus Qujaukitsullu politikerit sapaatit akunneranik sivisunerusumik suliaqarnissamut periarfissikkusuppai. Qujaukitsup kinguartitsinissamik siunnersuutaa Inatsisartunit marlunngornermi oqaluuserineqassaaq.
Inatsisit naapertorlugit aningaasanut inatsit novembarip ulluisa 15-ianni akuersissutigineqareertussaammat, kinguartitsinissamik siunnersuut Inatsisartunit oqaluuserineqaqqaassaaq.
Aamma aningaasanut inatsisip siulii arlallit novembarip ulluisa 15-iata kingorna akuersissutigineqarput. Aningaasanut inatsisissaq piffissaliussamut akuersissutigineqartoq kingulleq 2013-imi akuersissutigineqarpoq.
AAMMA ATUARUK Aningaasanut inatsisissatut siunnersuut: Aningaasaqarnikkut ilungersunartut arlallit
Aningaasanut inatsisissatut siunersuutip akuersissutigineqarnissaanut piffissaliussaq kinguartinneqassappat missingersuutinik, akileraarusiissutissat annertussusaannik aammalu meeqqanik paaqqinninnermut akigititassanik nutaanik akuersissuteqarnissat pilersaarutigineqartumit kingusinnerusukkut pissapput.
