Sikaritsinik tupanillu akitsuineq peqqinnissaqarfimmut oqilisaassisinnaasoq

Aningasartuutit sukannersumik aqukkaluaraanniluunniit, peqqinnissaqarfik utoqqaat amerlanerulernerisigut tatineqarneruleriartussaaq. Tamatumunnga sikaritsinut tupanullu akitsuutit qaffanneri aaqqiisutaasinnaasoq, aningaasaqarnermut siunnersuisoqatigiit naliliipput.
Sikaritsinut tupanullu akitsuutit Namminersorlutik Oqartussat ukiumut 150 millionit koruuningajannik iluanaarutigisarpaat.
Allattoq Jens Betak
septembarip 18-at 2019 15:59
Nutserisoq Hanne Petersen

Nunatsinni pujortartartut amerlapput. Nunatsinnimi angutit arnallu affaat sinnerlugit pujortartarput, tamannalu napparsimmavinnut - pujortartarnerup kingunerisaanik nappaatigineqalertartunut soorlu puakkut nappaammut KOL-imut aningaasartuuteqarujussuartartunut - akisuvoq.

Aningaasaqarnermut siunnersuisoqatigiit nalunaarusiaanni kingullermi allassimasut naapertorlugit sulisussaaleqisoqartarnera, aammali imaaliarsaartut nakorsaatinik nutaanik, pitsaanerusunik aammali akisunnerukkajuttunik pisariaqartitsisut amerliartornerat peqqinnissaqarfiup iluangersuaneranut tunngaviupput.

AAMMA ATUARUK Nalunaarusiaq: Nunatsinni peqqinnissaqarfimmut aningaasartuutit nunanut allanut sanilliullugit ikinnerupput

Taavami peqqinnissaqarfiup ilungersuanerata millisinnissaanut qanoq iliortoqarsinnaava? Aningaasaqarnermut siunnersuisoqatigiit isumaqarput, peqqinnissaqarfiup ilungersuanerata millisinnissaa innuttaasut peqqissuunissaannut annertuumik suliniuteqarnikkut taamatuttaaq sikaritsit tupallu akitsornerisigut qulakkeerluarneqarnerusinnaassasoq.

- Pujortartarnermut akiuineq pujortartartullu ikinnerulernissaannut suliniuteqarneq inuit inooriaatsiminnik aallaaveqartumik napparsimalertartut ikinnerulernissaannut sunniuteqarsinnaallutillu inuit ataasiakkaat peqqinnerulernissaannut iluaqutaasinnaapput, aammali peqqinnissaqarfimmut oqilisaassisinnaallutik, aningaasaqarnermut siunnersuisoqatigiit siullittaasuat Torben M. Andersen oqarpoq.

Isertitat ikiliartortut

Sikaritsinut tupanullu akitsuutit Namminersorlutik Oqartussat ukiumut 150 millionit koruuningajannik iluanaarutigisarpaat, taakkuali sikaritsinik tupanillu tunisakilliartornikkut ukiuni kingullerni ikiliartorsimapput.

Sikaritsinut tupanullu akitsuutit kingullermik 2007-imi qaffanneqarmatali aamma qaffaqqinneqarnikuunngillat. Tassa imaappoq, aningaasat ukiut tamaasa nalikilliartornerat sikaritsit tupallu akikilliartornerannut tunngaviusarmata pujortartarneq ukiuni aqqaneq-marlunni kingullerni akikilliartorsimavoq.

Peqqissutsimut naalakkersuisoq Martha Abelsen sikaritsinut tupanullu akitsuutit qaffanneqarnissaannut qanoq pilersaartoqarneranut apersorneqarsinnaasimanngilaq, Inatsisartulli akitsuutinik ukiaru qaffaanissaminnut pilersaanngillat.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk