Nalunaarusiaq: Nunatsinni peqqinnissaqarfimmut aningaasartuutit nunanut allanut sanilliullugit ikinnerupput

Peqqinnissamik nunatsinni neqerooruteqarnissaq nunanut allanut sanilliullugu inuiaqatigiinnut akisuvoq. Aningaasaqarnermut Siunnersuisoqatigiit ukiumoortumik nalunaarusiaminni taama naliliipput.
Nakorsat peqqissaasullu 40 procentiisa missaat taartaasuupput. Assi © : KNR / Malik Brøns
Allattoq Malik Brøns
septembarip 17-at 2019 13:40
Nutserisoq Ivik Kristiansen

Nunatsinni tunisat ataatsimut ukiumut nalingisa 6-7 procentiinut naapertuuttut peqqinnissaqarfimmut 90-ikkunniilli aningaasartuutaasarput. Taakkulu nunani allani aningaasartuutaasartunit ikinnerupput.

Aningaasaqarnermut Siunnersuisoqatigiit naapertorlugit nunat avannarliit tunisamik ataatsimut nalingisa 10 procentingajaannut naapertuuttut peqqinnissaqarfimminnut atortarpaat.

1,5 milliardit koruunit peqqinnissaqarfimmut ukiumut atortarpagut, taakkulu amerlineqassappata, akileraarutillu aammalu akitsuutit qaffanneqassanngippata, pisortat aningaasartuutigisartagaannit allanit tigusisoqartariaqassaaq.

AAMMA ATUARUK Aalisakkat akigi peqqissuuneq siuariartornerlu: Aningaasaqarnermut Siunnersuisoqatigiit nalunaarusiaanni maluginiagassat pingasut

- Tassa tamanna ajoraluartumik piviusuuvoq. Aningaasiveqanngilaq tigusiffigeriaannarmik oqarsinnaalluni: Aningaasanik ukuninnga peqqinnissamut aningaasaliissaagut. Aningaasat pissarsiareqqaagassaapput. Tassa aqqut ilungersornartoq, pingaarnersiuilluni oqarnissaq: Peqqinnissaq pingaaqaaq, allamit, immaqa ikinnerusunik aningaasassakinnerulertussanit pingaarnerutittariaqarparput, aningaasaqarnermut siunnersuisoqatigiit siulittaasuat Torben M. Andersen oqarpoq.

Taartaarsunut 60 millionit koruunit 

Peqqinnissaqarfiummi aningaasat missingersuummini nassaareriaannaanngikkai taanna oqarpoq.

Peqqinnissaqarfik sulisussaaleqereerpoq. Assersuutigalugu nunatta avataanit taartaasartunut ukiumut 60 millionit koruunit aningaasartuutaasarput.

- Taartaasartut atorfinitsissallugit akisuujupput. Aalajangersimasunik atorfinitsitserusunnartaraluarpoq, atorfippassuilli inuttassarsiugaapput, kisiannili naammattunik qinnueqartoqarani, uffalu uninngasunik suli passutassaqartoq. Taava taartaasussanik pissarsisariaqarluni. Allamik aaqqiissutissaqanngilaq, uninngasut passunneqartariaqarput, Torben M. Andersen oqarpoq.

Nakorsat peqqissaasullu 40 procentiisa missaat taartaasuupput.

Aningaasallu atorneqartartut nunat allat aningaasartuutaannut naapertuuttunut amerlineqaraluarpata, peqqinnissamut neqeroorutigineqarsinnaasut suli ikinnerussapput.

Aningaasartuutimmi 10 procentii napparsimasunik angallassisarnermut atorneqartarput.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk