Ikiuinissamut milllionilikkaat suminngaanniissanersut nalunartoq
Inuussutissarsiortunut, matutiterinermit ajornartorsiortunut, ikiuutissat piareeqqajaapput.
Tassami oqartussat coronavirusimik peqqutieqartumik Nuummik matusipiloornerat amerlasuullu katersuuteqqusaannginnerat inuussutissarsiortut milliuunilikkaanik annaasaqaatigaat. naalakkersuisut ikiuinissamut milliardit koruunit affaannik ikiuinissaq siunnersuutigaat, tamannalu aningaasaqarnermut akileraartarnermullu Ataatsimiititaliap taperserpaat.
ataatsimiititaliap siulittaasuata Hermann Berthelsenip (S) oqarnera naapertorlugu nunatta karsia ikiuinissamut aningaasaliissutissanik naammattunik imaqarpoq.
Ikiorsiissutit nunatsinni suliffeqarfiit coronavirusimik ajornartoornermi aniguinissaannut iluaqutaassapput. Aningaasat taakkua soraarsitsinissaraluanik pinngitsoortitsissutaaassallutillu aningaasarsiatigut annaasanut taartisiassanut atorneqassapput.
50 millionit koruunit namminersorlutik inuussutissarsiortunut aammalu kiffartuussinermik, neriniartarfiuteqarnermik takornariaqarnermillu inuussutissarsiutilinnut ikiorsiissutiginasuaatigineqassapput.
100 millionit koruunit ilaatigut aalisarnermik, angallassinermik sanaartornermillu inuussutissarsiutilinnut atorneqassapput.
107 millionit koruunit sulisut angerlartitat soraarsitaaqqunagit taakkua aningaasarsiassaannut atorneqassapput.
Suliffeqarfiit akileraarutinut akitsuutinullu akiliinissaannik kinguartitsineq. Tamanna nunatta karsianut qaammammut 250 millionit koruuninik akeqartassaaq.
- Nunatta karsia 1,6 milliarder koruuninik uninngasuuteqarpoq, tassalu tassanngaanniit aningaasat atorneqarnissaat aalajangiunneqarsimavoq, Hermann Berthelsen (S) KNR-imut oqarpoq.
Nunatta Karsia aningaasaqaaq, taakkualu ameerliartortarput, tamanna ilumoorpoq. taakkua akileraartutineersuullutik, akitsuutineersuullutillu ataatsimoortumik tapiissutineersuupput – tassalu ukiup ingerlanrani amerliartortarlutik.
Ukioq manna 50 mllionit koruuninik sinneqarnissaq missigiutaavoq – tassalu ikiunissamut aningaasat taakkunannga sinneruttunit pissarsiarineqartussaapput. Ikiuinissamulli aningaasaliussat maanna 500 milliuunit koruuniupput.
Taakkulu Hermann Berthelsenip innersuussutaanit 1,6 milliuunit koruuninit ikinnerupput.
KNR-ip aningaasat sinneri suminngaanniit pissarsiarineqassanersut itisilertikkusukkaluarpaa, iluatsinnaguli.
Coronap kipiluttunarnera akisusinnaasoq
Aningaasat aningaasaliissutaareersunik nikisitsinikkut pissarsiarineqarnissaat, aningaasaqarnermut naalakkersuisup, Vittus Qujaukitsup siusinnerusukkut nalilerpaa.
- Taamaasiornermi ilaatigut sanaartugassanut aningaasaliissutit kinguartikkallarneqarput, Vittus Qujaukitsoq nassuiaavoq.
Ikiuinissamut aningaasaliussat 257 milliuunit koruunit immikkoortunut marlunnut agguarneqarput. Sulisut angerlartinneqartut soraarsinneqannginniassammata aningaasarsiatigut annaasaannut 107 millioner koruunit immikkoortinneqarput.
Immikkoortullu aappaaniittut 150 milliuunit koruunit suliffeqarfiit mikisut akunnattumillu angissusillit annaasaannut matussutissatut immikkoortinneqarput.
AAMMA ATUARUK Coronap ajornartorsiortitsinera: Inuussutissarsiutit milliardip affaanik ikiorserpaat
Tamatuma saniatigut suliffeqarfiit tamarmik akileraarutinut akitsuutinullu akiligassaasa kinguartinneqarnissaannik periarfissinneqarput. Tamanna nunatta karsiata qaammammut 250 millioner koruuninik aningaasartuutigisagaaa, Hermann Berthelsenip atatsimiititaliamilu ilaasortaqataata, Múte Bourup Egede KNR-imut uppernarsarpaat.
Tassalu coronavirusip nunatsinni ajornartorsiortitsinera sivitsorpat aningaasartuutaanerujussuusinnaavoq.
Taamaalippallu sanaartugassatut pilersaarutaareersut unitsikkallarnissaat eqqarsaatinut ilaasut oqarpoq.
- Kisianni qanorluunniit ilioraluarutta nappaat una takkuppoq. Taamaammat pinngitsoorata qanoq iliuuseqartariaqarpugut.
Partii Naleraq tapersiinngitsoq
Nunarput nunanit allanit aamma taarsigassarsisinnaasoq, Hermann Berthelsen oqarpoq.
Aningaasalli suminngaanniit aaneqassanersut, Parti Naleraq aperivoq.
AAMMA ATUARUK Sulisitsisut: Ikiorsiissut suliffeqarfinnut ingerlanerliortunut amerlasuunut annaassissaaq
- Ataqqinaatissaannartut suliniutit sorliit unitsinneqassappat aammalu Covid-19-ip inuiaqatigiit matuneqarnerannik pisariaqartitsiffiujunnaarluni ulorianartorsiortitsiunnaanerata kingorna ajornartorsiornerup ingerlaannannginnissaa qanoq qulakkeerneqassava? Partii Naleqqap ilaasortaatitaa ikinnerussuteqarluni oqaaseqaammini ilaatigut taama aperivoq.
Covid-19-ip ajornartorsiutigineqarnera aningaasarpassuarnik naleqartussaassammat Aningaasanut Inatsit tamassunnga naleqqussarneqartariaqartoq, Parti Naleraq isumaqarpoq.
- Qinnuteqaammut matumunnga akuersinikkut ajornartorsiornermik aammalu tamat oqartussaaqataanerisa aaqqissuussaanerannik pimoorussinnginneruvoq, Parti Naleraq sinnerlugu Jens Napaattooq allappoq.
